Yeni il hədiyyələri saxta çıxdı

Bakıda 6 mağazada 87 kiloqrama yaxın olan 298 ədəd mənşəyi bəlli olmayan Yeni il hədiyyəsi aşkarlanıb

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti Yeni il hədiyyələri ilə bağlı monitorinqlərin nəticələrini açıqlayıb. Nazirliyin mətbuat xidmətindən Lent.az-a bildiriblər ki, bu dəfə yoxlamalar paytaxtın 5 rayonunda aparılıb. Reydlər nəticəsində saxta və yararsız hədiyyələrin aşkarlandığı mağazalar bunlardır:

Bakının Nəsimi rayonunda:
-Moskva prospekti, ev 58 ünvanında Rəfilə Aslanovaya məxsus mağazada;
-A.Məhərrəmov küçəsi, ev 45 ünvanında yerləşən "Şokaladnıy mir" mağazasında;

Yasamal rayonunda:
-Ş.Mehdiyev küçəsi, 1054 ünvanında yerləşən "Lider AS market"də;

Xətai rayonunda:
-A.Ələsgər küçəsi, 2946-cı məhəllədə yerləşən "Hobby market"də;

Nizami rayonunda:
-Q.Qarayev prospekti, ev 7A ünvanında yerləşən "Ruslan-93 market"də;

Sabunçu rayonunda:
-Bakıxanov qəsəbəsi, M.Fətəliyev prospekti, ev 53 ünvanında yerləşən "Qloriya" ticarət mərkəzində.

Monitorinq zamanı ümumi çəkisi 87 kiloqrama yaxın olan 298 ədəd mənşəyi bəlli olmayan Yeni il hədiyyəsi aşkarlanıb. Həmin məhsullar satışdan çıxarılaraq məhv edilib.

Antiinhisar Siyasəti və İstehlakçıların Hüquqlarının Müdafiəsi Dövlət Xidməti istehlakçılara yeni il hədiyyəsi alarkən diqqətli olmağı, hədiyyə qutularının üzərində istehsalçının adı, ünvanı, hədiyyənin tərkibi, istehsal tarixi, saxlama müddəti və s. məlumatların olmasına diqqət yetirməyi tövsiyə edir.

Elxan SALAHOV