6 ayda dövlət uşaq müəssislərindən 8 uşaq övladlığa verilib

Hazırda Azərbaycanın 46 dövlət uşaq müəssisəsində 9874 uşaq təlim-tərbiyə alır.

APA-nın məlumatına görə, bu rəqəmi təhsil naziri Misir Mərdanov bu gün Bakıda keçirilən “Azərbaycan Respublikası dövlət uşaq müəssisələrində uşaqların ailələrə verilməsi və alternativ qayğı Dövlət Proqramı” çərçivəsində “2010-cu ilin yekunları və qarşıda duran vəzifələr” mövzusunda keçirilən beynəlxalq konfransda açıqlayıb. Onun sözlərinə görə, həmin uşaqların 3860 nəfəri dövlət müəssisələrində oxuyur və yaşayır. Həmin uşaqların 590 nəfəri bu müəssisədə daimi olaraq yaşayır, 1356 nəfər hər şənbə və bazar evə gedir, 1914 nəfər hərdənbir evə gedir. Ümumilikdə 3860 uşağın 1473-ün sağlamlıq imkanları məhduddur.

Nazir deyib ki, uşaq müəssisələrinə verilən uşaqların sayı azalır. 2008-ci ildə uşaq müəssisələrinə 4055, 2009-cu ildə 3945, 2010-cu ildə 3860 uşaq verilib. Nazir deyib ki, Təhsil Nazirliyində övladlığa uşaq götürmək arzusunda olan və övladlığa verilməsi mümkün olan uşaqların siyahısı dəqiqləşdirilib. M. Mərdanovun sözlərinə görə, bu ilin son 6 ayı ərzində 8 uşaq övladlığa verilib.