Yenə qar gəlir

Bakı və Abşeron yarımadasında martın 31-də buludlu hava şəraiti üstünlük təşkil edəcək. Günün ikinci yarısında arabir yağış yağacağı gözlənilir.

Şimal-qərb küləyi əsəcək. Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyevin APA-ya verdiyi məlumata görə, havanın temperaturu gündüz 10-13 dərəcə, axşam 6-8 dərəcə isti olacaq.

Aprelin 1-də havanın buludlu olacağı, arabir yağış yağacağı, günün ikinci yarısında tədricən kəsiləcəyi gözlənilir. Şimal küləyi gündüz şimal-şərq küləyi ilə əvəz olunacaq.
Gecə 6-8, gündüz 10-12 dərəcə isti olacaq.

Aprelin 2-də havanın dəyişkən buludlu olacağı, arabir tutulacağı, gün ərzində, əsasən yağmursuz keçəcəyi gözlənilir. Cənub-şərq küləyi əsəcək. Gecə 6-8, gündüz 12-15 dərəcə isti olacaq.

Aprelin 3-də hava dəyişkən buludlu, əsasən yağmursuz keçəcək. Axşam havanın tutqun olacağı, gecəyə doğru bəzi yerlərdə yağış yağacağı gözlənilir. Şimal-şərq küləyi əsəcək.
Havanın temperaturu gecə 4-6 dərəcə, gündüz 12-15 dərəcə isti olacaq.

Azərbaycanın rayonlarında aprelin 1-də yağış, dağlıq ərazilərdə sulu qar, qar yağacağı gözlənilir. Gecə və axşam bəzi yerlərdə intensiv olacağı ehtimalı var. Qərb küləyi əsəcək.
Gecə 4-7, gündüz 10-15 dərəcə isti, dağlarda gecə 0-3 dərəcə şaxta, gündüz 3-8 dərəcə isti olacaq.

Aprelin 2 və 3-də hava, əsasən yağmursuz keçəcək. Gecə və səhər bəzi yerlərdə duman, ayrı-ayrı şərq rayonlarında çiskinli yağış gözlənilir. Şərq küləyi əsəcək. Havanın temperaturu gecə 3-6 dərəcə, gündüz 12-17 dərəcə isti, dağlarda gecə 3 dərəcə şaxtadan 2 dərəcəyədək isti, gündüz 5-10 dərəcə isti olacaq.