Əmək pensiyaçılarının 60,6 faizi qadınlardır

Hazırda Azərbaycanda əmək pensiyası alan 792 290 qadının 389 919 nəfəri çoxuşaqlı analardır

2010-cu il yanvarın 1-nə olan dürüstləşdirilmiş statistikaya əsasən, Azərbaycanda əmək pensiyası alan şəxslərin sayı 2009-cu ilin əvvəli ilə müqayisədə 33 294 nəfər artaraq (2,6 faiz) 1 308 432 nəfərə çatıb. Əmək pensiyaçılarının 39,4 faizi kişi (516 142 nəfər), 60,6 faizi isə qadınlardır (792 290 nəfər). Qadınlardan 389 919 nəfəri çoxuşaqlı analardır.

Dövlət Sosial Müdafiə Fondunun (DSMF) mətbuat xidmətinin rəhbəri Elman Babayev Lent.az-a bildirib ki, bu ilin yanvarın 1-i tarixinə dövlət qulluqçusu kimi pensiya alanların sayı 10 112 nəfər təşkil edir. Ümumilikdə əmək pensiyaçılarının 133 881 nəfəri işləyən pensiyaçılar, 37 481 nəfər güzəştli şərtlərlə əmək pensiyası hüququ olan şəxslərdir.

Elman Babayev bildirib ki, əlilliyə görə əmək pensiyası alan şəxslərin sayı 311 849 nəfər, ailə başçısını itirməyə görə əmək pensiyası alan şəxslərin sayı isə 137 924 nəfərdir. Əmək pensiyalarının orta aylıq məbləği 2009-cu ilin əvvəlinə nisbətən 5,3 faiz artaraq ilin sonuna 100,4 manat olub.

Xatırladaq ki, əmək pensiyası - “Əmək pensiyaları haqqında” qanunla nəzərdə tutulmuş qayda və şərtlərlə müəyyən edilən və məcburi dövlət sosial sığorta olunan şəxslərin onlara əmək pensiyası təyin olunduqdan əvvəl aldıqları əmək haqqı və digər gəlirlərin, yaxud sığorta olunan şəxslərin ölümü ilə əlaqədar onların ailə üzvlərinin itirdikləri gəlirlərin kompensasiyası məqsədi ilə vətəndaşlara aylıq pul ödənişidir. Əmək pensiyasının 3 növü var - yaşa görə əmək pensiyası, əlilliyə görə əmək pensiyası, ailə başçısını itirməyə görə əmək pensiyası. Mövcud qanunvericiliyə görə Azərbaycanda müxtəlif pensiya hüququ olan şəxslərə öz arzuları ilə yalnız bir pensiya təyin edilir.

Elxan SALAHOV