Elmar Qasımov İtaliya səfirini qəbul edib

Mario Ciorcio Stefano Baldiyə Bakı Ali Neft Məktəbinin “Fəxri qonaq” diplomu verilib

Bu gün İtaliyanın Azərbaycandakı səfiri Mario Ciorcio Stefano Baldi Bakı Ali Neft Məktəbində olub.

Lent.az-a verilən məlumata görə, Ali Neft Məktəbinin rektoru Elmar Qasımov Mario Ciorcio Stefano Baldi ilə görüşdə deyib ki, günü-gündən inkişaf edən ölkəmizdə beynəlxalq standartlara cavab verən kadrların hazırlanması gündəmdə olan əsas məsələlərdən biridir.

Prezident İlham Əliyevin “Neft kapitalını insan kapitalına çevirək” devizi də məhz bunun əyani sübutudur . Bakı Ali Neft Məktəbinə ən yüksək göstəricilərə malik tələbələrin qəbul olunduğunu söyləyən Elmar Qasımov hazırda yüksək səviyyədə təchiz olunmuş binada fəaliyyət göstərən Bakı Ali Neft Məktəbi üçün yaxın gələcəkdə ən müasir tələblərə cavab verən kampusun salınacağını nəzərə çatdırıb. Elmar Qasımov Bakı Ali Neft Məktəbinin beynəlxalq əlaqələrinin genişləndirilməsi istiqamətində görülən işlərdən danışıb, İtaliyanın elm və təhsil mərkəzləri ilə əməkdaşlıq əlaqələrinin qurulmasının xüsusi maraq kəsb etdiyini vurğulayıb.

Mario Ciorcio Stefano Baldi Azərbaycanda ingilis dilində tədris həyata keçirən belə müasir tipli texniki ali məktəbin yaradılmasının vaxtında həyata keçirilən çox önəmli bir layihə olduğunu vurğulayıb. O, Bakı Ali Neft Məktəbi ilə İtaliyanın tanınmış Piza Universiteti, “Alfa Prosess Kontrol” şirkəti və dünyada tanınmış ENİ şirkətinin Korporativ Universiteti arasında əməkdaşlıq əlaqələrinin yaradılması üçün lazımi tədbirlərin həyata keçirilməsinə hazır olduğunu bildirib. Görüşün sonunda Mario Ciorcio Stefano Baldiyə Bakı Ali Neft Məktəbinin “Fəxri qonaq” diplomu verilib.