Bakı ehtiyatda olan veteran və zabitlərin regional mərkəzi olacaq

Bu gün Bakıda Əfqanıstan Müharibəsi Veteranları İctimai Birliyinin təşəbbüsü və təşkilatçılığı ilə QHT-lərin MDB, Türkiyə ilə əlaqələri mövzusunda dəyirmi masa keçirilib.

Lent.az-ın məlumatına görə, tədbirdə Azərbaycan Respublikası Silahlı Qüvvələrinin Ehtiyatda olan Zabitlər Konfederasiyasının sədri, ehtiyatda olan general Məmmədhüseyn Sarıyev, Vətən Müharibəsi Veteranları İctimai Birliyinin sədri Füzuli Rzaquliyev, Azərbaycan Hərb Tarixi Muzeyinin rəisi, ehtiyatda olan polkovnik Əzizağa Qənizadə, Rusiyada yaşayan azərbaycanlı, beynəlxalq səviyyəli hüquqşünas Elman Paşayev də iştirak edib.

Bildirilib ki, E.Paşayev eyni zamanda Rusiya Silahlı Qüvvələri Veteranlar təşkilatının hüquq şöbəsinin rəhbəridir.

Tədbir iştirakçıları dünyanın istənilən bölgəsində yaşayan azərbaycanlıların uğurunun bütün Azərbaycanın uğuru olduğunu dilə gətiriblər.

Tədbirdə Türkiyə, Rusiyanın ehtiyatda olan zabitləri, müharibə veteranları ilə əlaqələrin inkişaf etdirilməsi, onların hamısının bir mərkəzdə birləşməsi məsələsi müzakirə edilib. Tədbirdə “Regional veteran fəaliyyəti” konfederasiyasının yaranması təklifi də irəli sürülüb.

Tədbirdə çıxış edən Prezident yanında Qeyri Hökumət Təşkilatlarına Dövlət Dəstəyi Şurasının üzvü, Tərxis Olunmuş Hərbçilərin Gəncləri Maarifləndirmə İctimai Birliyinin sədri Emin Həsənli bildirib ki, veteran və zabitlərin regional mərkəzləşməsi Azərbaycan həqiqətlərinin dünyaya çatdırılmasında əhəmiyyətli olacaq: “ Veteran zabitlərin bir mərkəzdə birləşməsi istiqamətində Azərbaycan böyük iş aparır. Çalışırıq ki, ehtiyatda olan zabitlər, müharibə veteranları beynəlxalq terror, beynəlxalq soyqırıma qarşı birgə fəaliyyət göstərsin. Bakını veteran, ehtiyatda olan zabitlər hərəkatının mərkəzinə çevirmək istəyirik. Bu istiqamətdə işlər görülür”.

E.Həsənli əlavə edib ki, bu ilin sentyabr ayının sonunda tədbirin davamı olaraq Bakıda böyük görüş keçirilməsi gözlənilir.