“O, məni, partiyanın əksər üzvlərini təhqir edirdi” - AÇIQLAMA

VHP sədri Sabir Rüstəmxanlının keçmiş müşaviri, professor Bəhmən Sultanlı partiya sıralarından qovulmasında bəzi VHP funksionerlərini ittiham edib. Lent.az-ın məlumatına görə, “Yeni Müsavat”a açıqlamasında, o, VHP-nin MSK-dakı təmsilçisi Almaz Qəhrəmanlı, təşkilat şöbəsinin müdiri Samir Əsədli, partiyanın mətbuat katibi Anar Niftəliyev və Ali Məclisin sədri Rafiq Manaflının illər uzunu ona qarşı böhtan kompaniyası aparmaqda suçlayıb.

Partiyanın təşkilat şöbəsinin müdiri S. Əsədli Lent.az-a bildirib ki, B. Sultanlının xisləti insanları təhqir etmək və böhtan atmaqdan ibarətdir: “O, partiyanın əksər üzvlərinin elektron poçtuna, o cümlədən mənim elektron poçtuna təhqir dolu sözlər göndərib. Sultanlı özü aktivlik nümayiş etdirə bilmədiyi üçün partiyanın aktiv və eyni zamanda, müxalif düşüncəli üzvlərinə şər-böhtan atırdı. Bəhmən Sultanlı qeyd edir ki, partiyanın Siyasi Şurasının 2007-ci ildən sonra iclası keçirilməyib. VHP sədri işləri ilə əlaqədar çox vaxt xarici səfərlərdə olur. Elə vaxt olur ki, Sabir bəy 1 ay xaricdə olur. Şuraya da o sədrlik edir. Ancaq bütün bunlara rəğmən nizamnaməyə uyğun olaraq Siyasi Şura öz iclaslarını keçirir. Sonuncu iclasımız ötən ay keçirilib. Həmin iclasda Sabir bəyin təhlükəsizliyi ilə bağlı Daxili İşlər Nazirliyinə müraciət edilib. Bəhmən bəy Şuranın üzvü deyil ki, iclasın keçirilib-keçirilmədiyi barədə xəbəri olsun” .

S. Əsədli onu da vurğulayıb ki, B. Sultanlının iddialarından fərqli olaraq, VHP-nin rayon şöbələrinin böyük əksəriyyəti İctimai Palatanın toplantılarında fəal iştirak edirlər. “Partiyamızın Gənclər Təşkilatının sədri Anar Niftəliyev aktivlik nümayiş etdirdiyi üçün Bəhmən bəy ona böhtanlar atır. Onu da qeyd edim ki, B. Sultanlı 1999-cu ildə VHP-dən çıxarılmışdı. Bundan sonra bir neçə partiyaya üzv oldu və elə məhz bu cür hərəkətlərinə görə, həmin partiyalardan da qovuldu. Amma yenidən VHP-yə qayıtdı”, - deyə Samir bəy bildirdi.