Dairə Seçki Komissiyalarının yeni tərkibi dəqiqləşdi

Qurumun mətbuat xidmətindən Lent.az-a daxil olan məlumata görə, iclasda dairə seçki komissiyalarının tərkibinin yenidən formalaşdırılması məsələsinə baxılıb.

Mərkəzi Seçki Komissiyasının sədri bildirib ki, Azərbaycan Respublikası Seçki Məcəlləsinin tələbinə görə, dairə seçki komissiyaları Mərkəzi Seçki Komissiyası tərəfindən təşkil edilir. Hər bir dairə seçki komissiyasının 9 üzvü olur. Üzvlərdən 3-ün namizədliyi deputatları Milli Məclisdə (MM) çoxluq təşkil edən siyasi partiyanı MSK-da təmsil edən komissiya üzvləri tərəfindən, 3-ün namizədliyi deputatları MM-də azlıq təşkil edən siyasi partiyaları MSK-da təmsil edən komissiya üzvləri tərəfindən, 3-ün namizədliyi isə heç bir siyasi partiyaya mənsub olmayan MM deputatlarını MSK-da təmsil edən komissiya üzvləri tərəfindən təqdim olunur. Dairə seçki komissiyasının üzvləri MSK-nın qərarı ilə təyin edilir.

Mərkəzi Seçki Komissiyasının üzvü Fuad Cavadov Milli Məclisdə çoxluq təşkil edən siyasi partiyanı MSK-da təmsil edən komissiya üzvləri, MSK-nın katibi Arifə Muxtarova namizədliyi heç bir siyasi partiyaya mənsub olmayan MM deputatlarını MSK-da təmsil edən komissiya üzvləri, digər katib Mikayıl Rəhimov isə deputatları MM-də azlıq təşkil edən siyasi partiyaları MSK-da təmsil edən komissiya üzvlər tərəfindən təqdim edilən namizədlər haqqında məlumat veriblər. Mərkəzi Seçki Komissiyası həmin namizədlərin müvafiq dairə seçki komissiyalarının üzvləri təyin olunması barədə qərar qəbul edib.

İclasda cari məsələlərə də baxılıb.