Bakıda İran dini emissarlarının iştirakı ilə qapalı toplantı keçirilib - FOTO

Bu gün Bakıda Gənclik metro stansiyasının yaxınlığındakı “Alsu” restoranında Azərbaycanda “Hicabı müdafiə və hicab məhbuslarının müdafiəsi komitəsi”nin adı altında dindarların toplantısı keçirilib. Lent.az-ın məlumatına görə, toplantıda 40-50 nəfər şəxs iştirak edib. Yığıncağa paytaxtın, eyni zamanda Azərbaycanın bölgələrindən gəlmiş dindarlar qatılıb.

Lent.az-ın toplantıda iştirak etmiş müxbirinin verdiyi məlumata görə, burada əsasən son vaxtlar ölkədə baş verən hadisələr müzakirə olunub. Çıxış edən şəxslər bir sıra sərt tənqidlər səsləndiriblər.

Onlar əsasən hicaba olan münasibətə, həmçinin bu yaxınlarda həbs olunan şəxslərlə bağlı tələblər səsləndiriblər. Eyni zamanda ölkədə islamofobiya mühitinin yaradıldığını bildiriblər və təcili olaraq bir neçə islami telekanalın yaradılmasını tələb ediblər.

Toplantının sonunda 7 bənddən ibarət qətnamə qəbul olunub. Burada həbsdə olan İslam partiyasının sədri Möhsün Səmədovun və onun partiyasının üzvlərinin, Həmçinin Nardaran qəsəbəsindən olan şəxslərin dərhal azad olunması, islamofobiya və şəhvət yayan proqramların dərhal dayandırılması və islami telekanalın fəaliyyətə başlamasına icazə verilməsi, hicabla bağlı qadağaları nəzərdə tutan qanunların ləğv olunması və sair kimi tələblər yer alıb. Sənəddə islamçıların keçirəcəkləri mitinqə dəstək verilməsi ilə bağlı çağırış da əksini tapıb.

Qeyd edək ki, toplantıda İrandan dindar qismində gəlmiş iki şəxs də iştirak edib. Lent.az-ın müxbiri onların adını dəqiqləşdirmək istəsə də, buna nail olmayıb.

Nizam RZA