“Azərbaycanın hədəfi xarici ölkələrdə 5 min tələbənin təhsil almasına nail olmaqdır”

“Azərbaycanın hədəfi xarici ölkələrdə 5 000 tələbənin təhsil almasına nail olmaqdır”. APA-nın məlumatına görə, bu sözləri Xaricdə Təhsil Alan və Məzun Olmuş Azərbaycanlı Gənclərin Beynəlxalq Forumunda çıxışı zamanı Avropa Şurasının gənclər, idman, mədəniyyət komitəsinin sədri Qabriella Battanini deyib.

O bildirib ki, Azərbaycan bu il Danimarka ilə bir yerdə Boloniya prosesinə qoşulub: “Gələn il isə Azərbaycanda bununla bağlı böyük beynəlxalq konfrans keçiriləcək. Azərbaycan bu konfransa ciddi hazırlaşmalıdır, bu işdə xaricdə təhsil alan tələbələr də yaxından iştirak etməlidirlər ”.

Q. Battanini bildirib ki, 2010-cu ildə Avropa Şurasının 1974-cü ildə təsis olunmuş Gənclər Mərkəzi yenidən bərpa edilib: “Mərkəzin yenidən qurulması işinə Azərbaycan yardım göstərib. Təkcə bu mərkəzdə ildə 2 min gənc müxtəlif treninqlər keçir”.

O, Azərbaycanın Avropa Şurası ilə birlikdə gənclər üçün yay məktəbləri təşkil etdiyini, Avropa Şurasının indi də həmin gənclərlə əməkdaşlıq etdiyini deyib.