Aktauda 20 Yanvar faciəsi ilə bağlı anım mərasimi keçirilib - FOTO

20 Yanvar faciəsinin 21-ci il dönümü ilə əlaqədar olaraq Azərbaycanın Aktau şəhərindəki baş konsulluğu Manqistau vilayətində yaşayan azərbaycanlıların “Dostluq” milli-mədəni cəmiyyəti ilə birgə anım mərasimi keçirib.

Konsulluğun mətbuat katibliyindən Lent.az-a verilən məlumata görə, Manqistau vilayətində yaşayan çox saylı soydaşlarımızla yanaşı, vilayətin tanınmış ziyalıları, müharibə və əmək veteranları, vilayətdə fəaliyyət göstərən digər diasporların rəhbərləri və üzvləri, qəzet və televiziya nümayəndələri iştirak ediblər.

Tədbirlə bağlı zalda 20 yanvar faciəsi ilə bağlı foto stend və kitabların sərgisi təşkil olunub. Tədbirin əvvəlində 20 Yanvar şəhidlərinin ruhu bir dəqiqəlik sükutla yad edilib. Baş konsul Rəşad Məmmədov deyib ki, 20 Yanvar Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olub. 1990-cı ilin 20 yanvarda ölkəmizə qarşı ərazi iddiaları irəli sürən Ermənistanın təcavüzkar hərəkətlərindən və keçmiş SSRİ rəhbərliyinin onlara havadarlığından hiddətlənən, Bakının küçələrinə və meydanlarına çıxaraq buna öz qəti etirazını bildirən geniş xalq kütlələrinə qarşı sovet ordusunun döyüş hissələrinin yeridilib. Həmin faciəli günlərdə öz ölkəsinin, xalqının azadlığını, şərəf və ləyaqətini hər şeydən uca tutan mərd Vətən övladlarının canlarından keçərək şəhidlik zirvəsinə ucalıblar. Rəşad Məmmədov Azərbaycanın suverenliyi və müstəqilliyi uğrunda həlak olanların ruhunun anılmasının hər bir azərbaycanlının borcu olduğunu söyləyib.

Daha sonra Manqistau vilayətindəki azərbaycanlıların “Dostluq” milli-mədəni cəmiyyətinin sədri, professor Yusif Quliyev və digər diaspora üzvləri çıxışlar ediblər. Onlar 20 Yanvarın Azərbaycan xalqının müstəqillik uğrunda apardığı mübarizənin ən şərəfli tarixi olduğunu vurğulayıblar. Çıxışlardan sonra 20 Yanvar faciəsi ilə bağlı film nümayiş etdirilib. Mərasimin sonunda 20 Yanvar şəhidlərinin ruhuna dualar oxunub və ehsan verilib.