Elmar Məmmədyarov İran, Misir və Litvanın yeni səfirlərini qəbul etdi

Xarici İşlər Nazirliyinin mətbuat xidmətindən Lent.az-a verilən məlumata görə, Elmar Məmmədyarov İran İslam Respublikasının ölkəmizə yeni təyin olunmuş səfiri Möhsün Pakayini qəbul edib.

Elmar Məmmədyarov İran səfirini ölkəmizə səfir təyin olunması münasibətilə təbrik edib və onun fəaliyyətinin iki ölkə arasındakı münasibətlərin daha da inkişafına töhfə verəcəyinə əmin olduğunu bildirib. O, ortaq tarixi və mədəni köklərə malik iki qonşu ölkə arasında münasibətlərin genişləndirilməsi baxımından qarşılıqlı səfərlərin həyata keçirilməsi və müxtəlif sahələrdə əməkdaşlıq imkanlarının araşdırılmasını önəmli sayıb. Möhsün Pakayin ölkəmizə səfir təyin olunmasından məmnun olduğunu söyləyib və Azərbaycan ilə İran arasında ikitərəfli münasibətlərin inkişaf etdirilməsi istiqamətində fəaliyyət göstərəcəyini diqqətə çatdırıb. O, iki ölkə arasında münasibətlərin müxtəlif sahələrdə genişləndirilməsi üçün potensialın olduğunu qeyd edib və ölkəsinin müstəqil Azərbaycanla əlaqələrin genişləndirilməsinə xüsusi əhəmiyyət verdiyini vurğulayıb.

Elmar Məmmədyarov Misirin yeni təyin olunmuş səfiri Tarik Abu Sinanı da qəbul edib. O, Misir səfirini Azərbaycana səfir təyin olunması münasibəti ilə təbrik edib və iki ölkə arasındakı münasibətlərin mövcud səviyyəsindən məmnunluğunu dilə gətirib. Tarik Abu Sina öz növbəsində ölkəmizə səfir təyin olunmasından məmnun olduğunu bildirib və iki ökə arasında münasibətlərin genişləndirilməsi üçün potensialın olduğunu diqqətə çatdırıb. O, ölkəmizdə fəaliyyəti müddətində bu münasibətlərin genişləndirilməsi istiqamətində səy göstərəcəyini diqqətə çatdırıb.

Elmar Məmmədyarov daha sonra Litva Respublikasının ölkəmizə yeni təyin olunmuş səfiri Arturas Jurauskası qəbul edib. Elmar Məmmədyarov Litvanın yeni səfirini ölkəmizə səfir təyin olunması münasibəti ilə təbrik və onun fəaliyyətinin Azərbaycan ilə Litva arasındakı münasibətlərin inkişafına töhfə verəcəyinə əminliyini dilə gətirib. Arturas Jurauskas ölkəsinin Azərbaycanla münasibətlərin inkişafında maraqlı olduğunu və ikitərəfli əlaqələrin genişləndirilməsi istiqamətində fəaliyyət göstərəcəyini bildirib.