Gülər Əhmədovanın müraciəti MSK-ya daxil olub

MSK-dan APA-ya verilən məlumata görə, müraciətə qanunla müəyyən olunmuş müddətdə baxılacaq. Qanunda isə müraciətə iki gün ərzində baxılması nəzərdə tutulur.

Gürcüstanda parlament seçkilərini izləyən MSK Məzahir Pənahov ölkəyə sabah qayıdacaq. Müraciətə onun qayıtmasından sonra baxılması gözlənilir.

Milli Məclis deputatının mandatdan imtina etməsi ilə əlaqədar deputatlıqdan məhrumetmə ilə bağlı məsələlərin qanunla müəyyən edilmiş qaydada Mərkəzi Seçki Komissiyası tərəfindən həyata keçirildiyini nəzərə alaraq, deputat Gülər Əhmədovanın deputatlıqdan könüllü olaraq imtina etməsi barədə müraciəti aidiyyəti üzrə baxılmaq üçün MSK-a göndərilib.

Xatırladaq ki, sentyabrın 25-də internetdə E. Abdullayev, deputat Gülər Əhmədova və Sabir adına Kitabxananın direktoru Sevinc Babayeva ilə bağlı video material yayılıb. Video materialda deputatla sabiq rektor və vasitəçi kimi təqdim olunan S. Babayeva arasında E. Abdullayevin Milli Məclisin üzvü seçilməsi üçün yüksək məbləğdə rüşvət verməsi, ondan əlavə məbləğ istənilməsi barədə dialoq əksini tapıb. Dialoqda yüksək vəzifəli şəxslərin də adı çəkilib.