VHP-nin yubileyindən maraqlı görüntülər-

Bu gün Vətəndaş Həmrəyliyi Partiyası (VHP) yaranmasının 20 illiyinə həsr olunmuş yubiley tədbiri keçirib.

Yubiley mərasimində ölkənin əksər siyasi partiyalarının rəhbərliyi, ziyalılar, millət vəkilləri, diplomatik korpus nümayəndələri və media iştirak edib.

Musavat.com-un məlumatına görə, yubiley tədbirini çıxış sözü ilə açan VHP sədri, millət vəkili Sabir Rüstəmxanlı partiyanın keçdiyi tarixi yola nəzər salıb: “Vətəndaş Həmrəyliyi Partiyası 1992-ci il sentyabrın 26-da təsis qurultayını keçirib. Vətəndaş həmrəyliyi, milli birlik idealogiyasını təbliğ edən VHP ölkənin aparıcı siyasi partiyalarından biridir. Vətəndaş həmrəyliyi olmayan yerdə heç nə mümkün deyil. Nə istiqlal, nə qurtuluş, nə sosial-demokratiya, nə dirçəliş, nə tərəqqi; birlik olmadan nə müsavatdan, bərabərlikdən söhbət gedə bilər, nə doğru yoldan; nə ana vətən qoruna bilər, nə də ana torpaq. VHP 20 ildir milli birlik və vətəndaş həmrəyliyi ideyasını ölkənin yeganə nicat yolu kimi təbliğ edir. VHP 1995, 2000, 2005 və 2010-cu illər parlament və bütün bələdiyyə seçkilərində iştirak etmiş, bütün çağırışlarda Milli Məclisdə təmsil olunmuşdur. Hazırda Məclisdə 3 deputatı, müxtəlif bələdiyyələrdə isə 115 bələdiyyə üzvü var. VHP bu günə kimi özünün 5 qurultayını keçirib. Hazırda partiyanın respublikanın 80 rayonunda yerli rayon və şəhər təşkilatı fəaliyyət göstərir. Partiyanın 26 mindən çox üzvü var. Partiyanın əlaqələri ölkə sərhədlərini aşmışdır. Bu gün VHP seçkili orqanlarda təmsilçiliyi və ictimai nüfuzu ilə ölkənin aparıcı siyasi partiyalarından biridir”.

Fotolar: musavat.com