GUAM BMT ilə əməkdaşlıqla bağlı qətnamə layihəsi təqdim edəcək

BMT Baş Assambleyasının 67-ci sessiyası çərçivəsində cari ilin 26 sentyabr tarixində Demokratiya və İqtisadi inkişaf uğrunda təşkilat olan GUAM-a üzv olan dövlətlərin Xarici İşlər Nazirləri Şurasının (XİNŞ) 18-ci iclası keçirilib. Xarici İşlər Nazirliyinin mətbuat xidmətindən Lent.az-a verilən məlumata görə, iclasda xarici işlər naziri Elmar Məmmədyarov, Gürcüstan xarici işlər naziri Q. Vaşadze, Ukrayna xarici işlər naziri K. Qrişenko, Moldovanın ABŞ-dakı səfiri İ. Muntyanu və GUAM-ın baş katibi V. Çeçelaşvili iştirak ediblər.

İclasda BMT Baş Assambleyasının 66-cı sessiyasının gündəliyinin 35-ci bəndinə uyğun olaraq GUAM məkanında həlli uzadılmış münaqişələr və onların beynəlxalq sülh, təhlükəsizlik və inkişafa təsirləri barədə qarşılıqlı fikir mübadiləsinin aparııb. Xarici İşlər Nazirləri Şurası BMT Baş Assambleyasının növbəti sessiyasında “BMT və Demokratiya və İqtisadi inkişaf uğrunda təşkilat olan GUAM arasında əməkdaşlıq” adlı qətnamə layihəsinin irəli sürülməsi barədə razılığa gəliblər. Eyni zamanda GUAM Parlament Assambleyasının Sədrinin növbəti iclasın 19-20 dekabr 2012-ci il tarixlərində Bakıda keçirilməsinə dair qərar bəyənilib. Xarici İşlər Nazirləri Şurası kiber təhdidlərə qarşı mübarizə, nüvə təhlükəsizliyi, kütləvi tədbirlər zamanı təhlükəsizlik kimi yeni sahələrdə əməkdaşlıq təşəbbüslərini dəstəkləyib. Xarici İşlər Nazirləri Şurası Nəqliyyat üzrə İşçi Qrupuna tövsiyə edib ki, GUAM nəqliyyat dəhlizinin inkişafı üçün Konsepsiyanın qəbul edilməsi məqsədilə bu sahənin məsul qurumlarının rəhbərlərinin görüşünü təşkil etsin. GUAM-Yaponiya arasında əməkdaşlığa dair proqramın layihəsi barədə də razılıq əldə ounub.