Qarabağ Blokunun Məclisi yaradılacaq

Sentyabrın 19-da Ümid Partiyasının Mərkəzi Qərərgahında Qarabağ Blokunun növbəti toplantısı keçirilib. Lent.az-ın məlumatına görə, toplantını giriş sözü ilə açan Ümid Partiyasının sədri, millət vəkili İqbal Ağazadə gündəm məsələləri ilə bağlı çıxış edib. O, Qarabağ Blokunun Məclisinin formalaşdırılmasının və ayda bir dəfə Məclisin iclasının keçirilməsinin zəruriliyini qeyd edib. Gələn ayın əvvəlində Qarabağ Blokunun Məclisinin ilk iclasının keçirilməsi və payız aylarında regionlarda açıq və qapalı görüşlərin keçirilməsi barədə qərar qəbul olunub.

Toplantıda sentyabrın 17-də Sumqayıtda baş vermiş partlayış hadisəsi geniş müzakirə olunub. Son zamanlar Türkiyədə baş vermiş terror hadisələri ilə bağlı müxtəlif çıxışlar olub. Terrorla mübarizə istiqamətində iki dövlət arasında əməkdaşlığın genişləndirilməsinin vacibliyi qeyd edilib. İslam Peyğəmbərinin təhqir olunduğu film barəsində çıxışlarda Qarabağ Bloku adından bu cür halların yolverilməz olduğu bildirilərək qəti surətdə pislənib. Rusiyanın Şimali Qafqazda həyata keçirdiyi geniş miqyaslı hərbi təlim mövzusunda toplantı iştirakçıları arasında geniş müzakirələr aparılıb.