MTN-nin Akademiyasının kursantları Vətənə sədaqət andı içiblər - FOTO

Milli Təhlükəsizlik Nazirliyinin (MTN) Heydər Əliyev adına Akademiyasına yeni qəbul olunmuş kursantlar Vətənə sədaqət andı içiblər. MTN-in İctimai Əlaqələr Mərkəzindən Lent.az-a verilən məlumata görə, təntənəli mərasimdə əvvəlcə hərbi marşın sədaları altında sıra meydanına akademiyanın Döyüş Bayrağı gətirilib, sonra Dövlət Himni səsləndirilib.

Akademiya rəisinin müavini general-mayor İsgəndər Allahverdiyev gənc kursantları və onların valideynlərini bu əlamətdar gün münasibəti ilə təbrik edərək, hərbi andın Vətənə, xalqa, müstəqil Azərbaycana sədaqət andı olduğunu bildirib. Onun sözlərinə görə, bu xüsusi təyinatlı ali təhsil müəssisəsinin kursantı olmağa layiq görülmüş gənclər çətin və şərəfli peşənin sirlərinə yiyələnərək əsl zabit kimi yetişməli, milli maraqların etibarlı təmin olunması sahəsində qarşıya qoyulmuş bütün vəzifələri peşəkarlıqla yerinə yetirməlidirlər. Bunun üçün daim öz üzərində işləmək, təhsildə və xidmətdə yüksək nəticələr göstərmək, nizam-intizamlı olmaq lazımdır. İsgəndər Allahverdiyev Azərbaycanda ordu quruculuğu sahəsində həyata keçirilən tədbirlərdən danışıb və çıxışının sonunda Akademiyaya daim göstərilən yüksək diqqət və qayğıya görə Prezident, Ali Baş Komandan İlham Əliyevə, nazir Eldar Mahmudova Akademiyanın rəhbərliyi və şəxsi heyət adından dərin təşəkkürünü bildirib.

Çıxış edən gənc kursantlar bu ali təhsil müəssisəsinə daxil olduqları üçün qürur duyduqlarını bildirib, təlim-tədris və hərbi-fiziki hazırlıq üzrə ən yüksək göstəricilərə nail olacaqlarına söz veriblər. Valideynlər də çıxışlarında Akademiyada yaradılmış hərtərəfli şəraitə görə Ali Baş Komandan İlham Əliyevə və MTN rəhbərliyinə minnətdarlıqlarını ifadə ediblər. Tədbirin sonunda təhsil müəssisəsinin akt zalında Akademiyanın rəhbərliyi valideynlərlə görüş keçirərək onları maraqlandıran sualları cavablandırıb.