Əliyev və Ərdoğan Şəkinin seyrində - FOTO

Sentyabrın 12-də prezident İlham Əliyev, xanımı Mehriban Əliyeva və baş nazir Rəcəb Tayyib Ərdoğan, xanımı Əminə Ərdoğan XIX əsrin tarixi-memarlıq abidəsi olan Şəki Cümə məscidinə baş çəkiblər. Lent.az-ın AzərTAc-a istinadən verdiyi məlumata görə,
Azərbaycan prezidentinə və Türkiyə baş nazirinə Cümə məscidi və burada fəaliyyət göstərən Şəki İslam Mədrəsəsi barədə məlumat verilib. Prezident İlham Əliyev və baş nazir Rəcəb Tayyib Ərdoğan mədrəsənin tələbələri ilə görüşüb söhbət ediblər.
Şəki Cümə məscidi ilə tanışlıqdan sonra Ərdoğana Qurani-Kərim hədiyyə olunub.
Türkiyənin Baş naziri də Cümə məscidinə Qurani-Kərim hədiyyə edib.

Sonra prezident İlham Əliyev, xanımı Mehriban Əliyeva və baş nazir Rəcəb Tayyib Ərdoğan, xanımı Əminə Ərdoğan Şəkidə XVIII əsrdə Şərq memarlığı üslubunda tikilmiş Yuxarı Karvansaray mehmanxana kompleksi ilə tanış olublar.

Prezident İlham Əliyev, xanımı Mehriban Əliyeva və baş nazir Rəcəb Tayyib Ərdoğan, xanımı Əminə Ərdoğan bu gün həmçinin Şəki Xan sarayı ilə tanış olublar. Əvvəlcə Şəki Xan sarayının önündə xatirə şəkli çəkdirilib.

Ərdoğana və xanımına Xan sarayının 250 illik yubileyi münasibətilə hazırlanmış gümüş sikkələr hədiyyə edilib. Prezident İlham Əliyevə, xanımına və baş nazir Rəcəb Tayyib Ərdoğana, xanımına sarayın 250 illik yubileyi münasibətilə nəfis tərtibatda nəşr edilmiş kitablar təqdim olunub. Dövlət başçısı, xanımı və Türkiyənin baş naziri, xanımı kitabları imzalayaraq bir-birinə təqdim ediblər. Daha sonra prezident İlham Əliyev, xanımı Mehriban Əliyeva və baş nazir Rəcəb Tayyib Ərdoğan, xanımı Əminə Ərdoğan çay süfrəsinə qonaq olublar.