Macar ziyalılardan Azərbaycana dəstək

Budapeştdə ömürlük həbs cəzası çəkən Ramil Səfərovun Azərbaycana ekstradisiya olunması və Azərbaycan Respublikasının Prezidenti tərəfindən əfv edilməsindən sonra macar mətbuatının, radio və televiziyalarının, elektron KİV-lərinin əsas mövzusu Azərbaycan olub. Azərbaycanın Macarıstandakı səfirliyindən Lent.az-a bildirilib ki, erməni diasporu hər vasitə ilə həqiqəti təhrif etməyə, ölkəmizə qara yaxmağa çalışır. Belə şəraitdə Azərbaycanın haqq mövqeyini müdafiə edən macarların fikirləri xüsusi ilə qiymətlidir. Macarıstanlı türkoloq Eva Csaki və tanınmış musiqişünas, professor Janos Sipos son günlərdə Macarıstanda Azərbaycan əleyhinə səslənən fikirlərlə əlaqədar narahatlıqlarını ifadə edərək səfir Vilayət Quliyevə məktub ünvanlayıb. Məktub müəllifləri Azərbaycan xalqına rəğbət və dəstəklərini ifadə ediblər

.
Məktubda J.Siposun Azərbaycanda musiqi folkloru araşdırmaları zamanı Dağlıq Qarabağdan olan məcburi köçkünlərlə görüşdüyü xatırlanır, “Azərbaycan xalqının çətinliklərini yaxşı başa düşürük. Bu çətin gününüzdə yanınızdayıq” deyilir.