Evdə pişik saxlamaq yalnız xoş əhvali-ruhiyyə və ünsiyyət demək deyil. Araşdırmalar göstərir ki, pişiklərlə yaşamaq ürək-damar sağlamlığı, uşaqların inkişafı və psixoloji vəziyyətlə müəyyən əlaqələrə malik ola bilər.
Lent.az xarici mediaya istinadən xəbər verir ki, Minnesota Universitetinin mütəxəssisləri təxminən 4 min amerikalını 10 il ərzində müşahidə ediblər. Məlumatlara görə, evində pişik saxlayan insanlarda insult və ya infarkt riskinin təxminən 30 faiz aşağı olduğu qeydə alınıb. Bununla belə, tədqiqat pişiyin birbaşa olaraq ürək-damar xəstəliklərinin qarşısını aldığını sübut etmir.
Söhbət yalnız müşahidə olunan əlaqədən gedir. Pişiklərin mırıltısı da alimlərin diqqətini çəkən məqamlardandır. Bildirilir ki, təxminən 20–30 Hz tezlikli vibrasiyalar sümük, əzələ və vətərlərə müsbət təsir göstərə bilər.
Pişiklə böyüyən uşaqlarda da müəyyən faydalar müşahidə oluna bilər. Erkən yaşlardan ev heyvanı ilə ünsiyyət sosial bacarıqların inkişafına kömək edə, heyvana qulluq isə uşaqlarda məsuliyyət hissini formalaşdıra bilər.
Bəzi araşdırmalarda uşağın həyatının ilk ilində ev heyvanları ilə təmasının gələcəkdə müəyyən allergik reaksiyaların yaranma riskinin azalması ilə əlaqəli ola biləcəyi qeyd edilir. Eyni zamanda, heyvanlarla böyüyən uşaqların immun sistemində də müəyyən fərqlər müşahidə oluna bilər.
Pişiklərin insanın psixoloji vəziyyətinə də müsbət təsir göstərə biləcəyi bildirilir. Onlar stressli və çətin dövrlərdə sahibinə emosional dəstək verə, tənhalıq hissini azalda bilərlər. İnsanlar ev heyvanları ilə ünsiyyət zamanı hisslərini daha rahat ifadə edə bilirlər.
Heyvan davranışları üzrə araşdırmalar göstərir ki, pişiklər də sahiblərinə bağlılıq formalaşdıra bilirlər. Yaxşı münasibət olduqda pişik insanı öz mühitinin vacib hissəsi kimi qəbul edə və onunla davamlı emosional əlaqə yarada bilər. Maraqlı məqamlardan biri də ev heyvanlarının tanışlıqlara təsiridir. Bəzi sosioloji araşdırmalarda qadınların ev heyvanı saxlayan kişilərə daha çox diqqət yetirdiyi qeyd olunur.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
