Müğənni Musa Musayevin qardaşı Əli Musayevin Lent. az-a müsahibəsi:
- ANS televiziyasında Təranə Qumralın dediyi fikirlər həqiqətdirmi? O, deyib ki, sizə maddi baxımdan yardım edib.
- Onların çıxışlarına baxdım. Guya, Təranə mənə avtomobil, əyin – baş, telefon, alıb. Alıbsa sübut etsin. Hansı dükandan alıb? O mənə heç nə almayıb. Mənim buna ehtiyacım da yoxdur. Hazırda Musa Musayevin avtomobili bankdadır. Onun pulu olsaydı, gedib keçmiş həyat yoldaşının maşının çıxarardı. Əksinə, geyimləri Musaya mən almışam. Onların puluna qalmamışam. Özümün evim, işim qazancım da var. Bu ayın 14 – də, Musa zəng edib dedi ki, 17- ci polis bölməsindəyəm, gəl məni qurtar. Mən də getdim, onu gətirdim və bir neçə gün ona qulluq elədik. Çünki, onun gedəcəyi başqa yeri yoxdur.
- Qardaşınızın keçmiş həyat yoldaşını şəmkirli biznesmenlə tutmasına inanırsınızmı? Ümumiyyətlə, belə bir şey olubmu?
- Xeyir, o barədə nəsə deyə bilmərəm. Çünki görməmişəm. Eşitdim ki, guya Musa onu kişi ilə tutub. Əgər tutubsa, buna Musanın özü cavabdehdir. Məncə belə şey ola bilməz. Həm də sizə deyim ki, on yeddi ildir, mənim onlardan xəbərim yoxdur. Təranə ilə üz-üzə də gəlməmişəm. Sadəcə, zəngləşmişik. Təranənin iradları olub ki, Musa bu pulları hara xərcləyir?
- Qardaşının Cabbarın Təranə Qumral barədə söylədiyi açıqlamalara münasibətiniz?
- Cabbarın öz fikridi. O, istəmirdi ki, onların evliliyi baş tutsun. Musa da onun sözlərinə əhəmiyyət vermədi, Təranə ilə evləndi. Cabbar o xanımın keçmişinə bələddir, incəsənət adamıdır, oradakı insanlar barədə informasiyası daha çoxdur. Elə o vaxtdan da Musa ilə küsülüdür.
- Bəs, Təranə Qumralın Cabbar Musayevə söylədiyi fikirlərə nə deyərdiniz?
- Cabbar qeyrətli qardaşdır. Təranənin bu fikri ilə razı deyiləm. Sizin sayt vasitəsi ilə üzümü o qadına tutub, deyirəm ki, bəsdir yalan danışdın. Bütün xalq bilir ki, Cabbarın təmiz bir ailəsi var. Siz ona sual verin ki, Təranə, sənin keçmişin nə olub? Nə üstündə ayrılmısan? Niyə boşanmısan? Öz gözündə tiri görməyib, başqasında nəsə axtarmaq lazım deyil. Əmimdən sonra mənim ağsaqqalım odur. Cabbarın həyat yoldaşı bizim böyük gəlinimiz, bacımızdır. Namuslu, qeyrətli bir qadındır. Onu Təranə ilə eyni tərəziyə qoymaq olmaz. Kaş, bütün qardaşlar Cabbar kimi olsun.
- Yəqin Musa Musayevin ananız barədə dediyi sözləri də eşitdiniz?
- Ana müqəddəs varlıqdır. Yetmiş beş yaşlı bir ana oğluna nə arzulaya bilər? Hər zaman deyib ki, onunla ailə qurmusan, dolan. Ana heç vaxt istəməz ki, oğlu gedib küçələrdə qalsın. Musanın gözündən gəlsin. Heç anasından xəbəri var? Heç bir dəfə anasına dərman alıb. Buna görə də onun ana barədə nəsə söyləməsi düzgün deyil.
- Nədənsə, bu məsələlərə əminiz Niyammədin Musayev heç bir münasibət bildirmədi...
- Bu məsələ əmimin Bakıda olmamağına görə baş verdi. Əmim paytaxtda olsaydı, Musanın duxu çatmazdı belə söhbətlər eləsin, canlı efirə çıxıb ağzına gələni danışsın. Əmim hələ Moskvadadır. Şou hələ qabaqdadır. Əmim Bakıya qayıdandan sonra jurnalistləri başına cəm edib, bu məsələyə aydınlıq gətirəcək.