Ailə həyatı qurmağa hazırlaşan müğənni...170 manat 37 qəpik ziyana düşdü - REPORTAJ

Onları hər gün efirdə, qəzet və jurnal səhifələrində, saytlarda görürsünüz. Müxtəlif açıqlamalar verirlər, qalmaqal yaradırlar, bir sözlə gündəmdə qalmağa çalışırlar. Maraqlananlar, fanatları, onların ən adi hobbilərindən tutmuş, qarderoblarında belə nələrin olduğunu deyə bilərlər. Hətta nə vaxt yuxudan durub, nə vaxt yatdıqlarını, nə yeyib, nə içdiklərini belə mediadan gizlətmirlər.

Amma onlarında asudə vaxtları, qayğıları olur. Onlar da hamı kimi dükan-bazara gedir, ərzaq alır, yemək bişirir, qonaq çağırır… Deyəsən çox uzatdıq; qısası, bir layihəyə start verdik: “Bazarlıq”. İstəyirik öyrənək görək, kimlər gündəlik bazarlığını harada edir, nə alır, hansı məhsullara üstünlük verir və nəhayət nə qədər pul xərcləyir?

***

...Onunla görüşümüz heç vaxt alış-veriş etmədiyi bir super marketin qarşısında oldu. Söhbət əsnasında öyrənə bildim ki, bir neçə gün qabaq bazarlıq edib və özü çox nadir hallarda alış-verişə çıxır.

- Bazarlıq etməklə heç aram yoxdur. Çox nadir hallarda edirəm. Çünki başım qarışıq olur, vaxt qalmır. Bazarlığı evdəkilər edir. Mən nə bilirəm ki, nə var, nə yox. Çünki evdə çox az oluram.

Marketə giririk. Hər kəs təəccüblə bizə baxır. Vasif Məhərrəmli satıcıdan arabanın hansı tərəfdə olduğunu soruşur. Satıcı arabanın yerini göstərir.

Vasif deyir ki, öncə süd məhsulları alacam. Bölməyə yaxınlaşırıq. “Niyə məhz süd məhsulları”-deyə, soruşuram.

- Yalçın, heç bilmirəm ki, nə alacam, nə almayacağam. Belə, hər şeydən bir az...

Kənd qatığı, 4 ədəd xama, yoğurt alıb, keçirik ət məhsulları satılan bölməyə.

Satıcıdan təzə mal əti istəyir.

Danışığından məlum olur ki, ət seçə bilmir.

- Mənə 2 kiloqram mal əti verin. Amma təzə olsun.

- Vasif müəllim, bizdə ətlər təzədir. Hər gün təzə ət gətirirlər.

İki kiloqram mal əti alır.

- Yalçın, orada kənd toyuğu görürəm. Baxaq, təzədirsə alım.

Satıcıdan toyuqları vitrindən çıxarmasını tələb edir.

Satıcı 2 ədəd toyuq çıxarır.