Sağlamlıq mərkəzinin rəhbərini öldürüb göl kənarına atanların məhkəməsi BAŞLADI

Bakı Ağır Cinayətlər Məhkəməsində Bakıda sağlamlıq mərkəzinin rəhbəri Babək Rəhimlini qətlə yetirməkdə təqsirləndirilən Natiq Fətiyevin və Quliyeva Fərqanənin cinayət işi üzrə məhkəmə hazırlıq iclası keçirilib.

Lent.az xəbər verir ki, hakim Azər Tağıyevin sədrliyi ilə keçirilən iclasda məhkəmə anket məlumatlarını dəqiqləşdirib, təqsirləndirilən şəxsə onun hüquq və vəzifələri izah edilib.

Qısa müşavirədən sonra məhkəmə tərkibi işin məhkəmə baxışına verildiyini, 13 noyabr saat təyin olunduğunu elan edib.

Xatırladaq ki, 2026-cı ilin iyulun 9-da Nərimanov rayonu A.Gəraybəyli küçəsində yerləşən “SUDU” sağlamlıq mərkəzinin rəhbəri, paytaxt sakini, 1985-ci il təvəllüdlü Babək Rəhimlinin baş nahiyəsinə küt alətlə vurularaq öldürüldüyü məlum olub. Onun sürücüsü işləyən Bakı şəhər sakini, 1988-ci il təvəlüldlü Natiq Fətiyev və sözügedən sağlamlıq mərkəzində qeydiyyatçı vəzifəsində çalışan Fərqanə Quliyeva qətldə şübhəli bilinirlər.

Məlumata görə, Natiq Fətiyev münaqişə zəminində Babək Rəhimlini öldürüb, daha sonra meyiti maşınına qoyaraq gecə saatlarında Salyan rayonu Kürsəngi kəndinin ərazisində yerləşən gölün kənarına atıb. Bu zaman Salyan rayon Polis Şöbəsinin əməkdaşları tərəfindən saxlanılıb.

Faktla bağlı cinayət işi başlanılıb, Natiq Fətiyev Cinayət Məcəlləsinin 120.2.1-ci (bir qrup şəxs tərəfindən qəsdən adam öldürmə), 120.2.5-ci (tamah məqsədi ilə adam öldürmə) və 177.2.3-1-ci (Oğurluq - elektron məlumat daşıyıcılarından, yaxud informasiya texnologiyalarından istifadə edilməklə törədildikdə) maddələri ilə məsuliyyətə cəlb olunub, barəsində həbs qətimkan tədbiri seçilib.