Mərkəzi Bank: Nağdsız hesablaşmalar yüksək səviyyəyə çatdırılacaq

Mərkəzi Bankın dəstəyi ilə “Visa İnc.” beynəlxalq kart təşkilatı tərəfindən ölkədə nağdsız ödənişlərin inkişaf etdirilməsi, ödəniş kart sahibləri tərəfindən nağdsız ödənişlərin aparılmasının stimullaşdırması məqsədilə təşkil olunan “Həyat Visa ilə rahatdır” milli marketinq kampaniyasının təqdimat mərasimi keçirilib.

Mərkəzi Bankın Kommunikasiya Departamentindən Lent.az-a verilən məlumata görə, tədbiri giriş nitqi ilə açan Mərkəzi Bankın sədrinin birinci müavini Alim Quliyev Mərkəzi Bankın hər zaman olduğu kimi öz mandatına uyğun olaraq ölkədə nağdsız ödənişlərin həcminin artırılmasını özünün prioritet sahələrindən biri hesab etdiyindən bu istiqamətdə davamlı olaraq müxtəlif tədbirlər həyata keçirdiyini söyləyib.

Alim Quliyev yaradılmış geniş infrastruktur imkanlar barədə məlumatı diqqətə çatdırmaqla nağdsız ödənişlərin kütləviləşdirilməsində əhalinin mühüm əhəmiyyət kəsb etdiyini və məhz bu səbəbdən Mərkəzi Bankın ev təsərrüfatı və biznes icmasının maliyyə savadlılığının artırılmasına xüsusi diqqət ayırdığını bildirib. Onun sözlərinə görə, ölkə başçısı İlham Əliyev tərəfindən ölkədə nağdsız hesablaşmaların həcmini artırmaqla və əhatə dairəsini genişləndirməklə göstəricilərin inkişaf etmiş ölkələr səviyyəsinə çatdırılması istiqamətində aidiyyatı dövlət qurumlarına bir sıra tapşırıqlar verilib. Alim Quliyev öz çıxışında tapşırıqların icrası istiqamətində görülmüş işlər barəsində ətraflı məlumat verib. O qeyd edib ki, artıq nağdsız ödənişlərin inkişafının stimullaşdırılması, nağdsız ödənişlər üzrə infrastrukturun genişləndirilməsi və hüquqi bazanın möhkəmləndirilməsi üzrə kompleks tədbirlər paketi hazırlanaraq hökumətə təqdim edilib. “E-hökumət” quruculuğu çərçivəsində dövlət qurumlarının informasiya sistemlərinin Milli Ödəniş Sisteminin infrastrukturuna inteqrasiyası, habelə elektron ödəniş xidmətlərindən istifadənin artırılması istiqamətində görülən tədbirlər çərçivəsində Mərkəzi Bank tərəfindən yaradılmış “Hökumət Ödəniş Portalı” vergi, rüsum, icarə haqqı, inzibati cərimələr və digər büdcə ödənişləri üzrə vahid ödəniş platformasına çevrilməkdədir. Alim Quliyev beynəlxalq kart təşkilatları ilə birgə reallaşdırılmış layihələr haqqında da danışıb. O, görüləcək kompleks tədbirlər qısa müddət ərzində ölkənin nağdsız hesablaşmalar üzrə göstəricilərinin yüksək səviyyəyə çatdırılmasına imkan verəcəyini bildirib.

“Visa İnc.” beynəlxalq kart təşkilatının MDB və Cənub-Şərqi Avropa üzrə baş meneceri Katarjina Sosin təmsil etdiyi təşkilatın Azərbaycan Mərkəzi Bankı ilə əməkdaşlığını yüksək qiymətləndirib. Onun sözlərinə görə, Mərkəzi Bankın nağdsız ödənişlərin inkişafına yönəlmiş davamlı və düşünülmüş siyasəti ölkə iqtisadiyyatında nağdsız ödənişlərin həcminin artırılmasına və elektron ödənişlər infrastrukturunun daha da inkişaf etdirilməsinə, nəticə etibarilə daha çox azərbaycanlının rahat, müasir və təhlükəsiz ödəniş vasitələrinə çıxışına zəmin yaradıb. “Azərbaycanda “Visa İnc.” beynəlxalq kart təşkilatının indiyədək keçirdiyi promo kampaniyaların mövcud nəticələri bu ölkədə nağdsız ödənişlərə yüksək marağın olduğunu göstərir: “Biz tamamilə əminik ki, “Həyat Visa ilə rahatdır” kampaniyası da uğurlu olacaq”.

Tədbir zamanı iştirakçılara “Visa İnc.” beynəlxalq kart təşkilatı tərəfindən təqdimat nümayiş etdirilib. Təqdimatdan sonra sual-cavab sessiyası təşkil olunub. Milli marketinq kampaniyası çərçivəsində “Visa” brendli ödəniş kartı sahiblərinə seçilmiş təsərrüfat subyektlərində nağdsız ödənişlərin aparılması zamanı endirimlər təklif olunacaq. Bu kampaniya bankların ödəniş kartları portfelinin genişləndirilməsini və kart sahibləri tərəfindən nağdsız ödənişlərin aparılmasını stimullaşdıracaq. “Həyat Visa ilə rahatdır” devizi altında keçirilən kampaniya 16-31 may tarixlərində davam edəcək.