Əli Abbasov Dünya İqtisadi Forumunun tədbirinə qatılıb

Rabitə və informasiya texnologiyaları naziri Əli Abbasov Dünya İqtisadi Forumunun İordaniya Haşimilər Krallığında keçirilən Yaxın Şərq və Şimali Afrika üzrə tədbirində iştirak edib.

Rabitə və İnformasiya Texnologiyaları Nazirliyinin mətbuat xidmətindən Lent.az-a verilən məlumata görə, İordaniya Kralı II Abdullah, ABŞ-ın dövlət katibi Con Kerri, Fələstinin lideri Mahmud Abbas, həmçinin bir sıra ölkələrin sabiq hökumət başçıları, siyasi xadimlər, iqtisadçı ekspertlər, 1000-ə yaxın iştirakçı, 50-dən çox ölkənin parlament, o cümlədən vətəndaş cəmiyyəti üzvlərinin iştirak etdiyi tədbirdə nazir Əli Abbasov Azərbaycanda respublika Prezidenti İlham Əliyevin rəhbərliyi ilə İKT sektorunda həyata keçirilən islahatlar, regionun inkişafında xüsusi çəkisi olacaq TASİM və "Eurasian Connectivity Alliance" (EuraCA) layihələrindən, eyni zamanda vətəndaşların, ümumilikdə istehlakçıların elektron xidmətlərdən istifadəsi istiqamətində ölkəmizdə əldə olunan uğurlu nəticələrdən söz açıb.

Əli Abbasov Forum çərçivəsində İordaniyanın informasiya və kommunikasiya texnologiyaları, ticarət və sənaye naziri Hatem Hafiz Əl-Halavani, “Jumeirah Group”, “Invest Suisse” şirkətlərinin, o cümlədən dünyanın nüfuzlu şirkətlərinin rəhbərləri ilə ikitərəfli görüşlər də keçirib. Görüşlərdə əsasən ölkəmizə, xüsusən də Yüksək Texnologiyalar Parkına investisiyaların cəlb olunması və Azərbaycan şirkətlərinin xarici bazarlara çıxış imkanlarının genişləndirilməsi, Birləşmiş Ərəb Əmirliklərinin (BƏƏ) nüfuzlu Datamatix şirkətinin və Dubay Ticarət Palatasının inzibati rəhbərliyi ilə keçirilən görüşlərdə cari ilin 2-5 dekabr tarixlərində Bakıda keçiriləcək Bakutel-2013 sərgisi çərçivəsində I Azərbaycan-BƏƏ İKT Forumunun təşkili, BƏƏ-nin sərgidə xüsusi pavilyonla təmin olunması, bu ölkə ilə texnopark, İKT Fondu, İT Universiteti, genişzolaqlı internetin inkişafı sahəsində təcrübə mübadiləsi aparılması kimi məsələlər müzakirə olunub.