Mərkəzi Bankdan bank sektoruna XƏBƏRDARLIQ - YENİLƏNİB

Azərbaycan Mərkəzi Bankının (AMB) İdarə Heyətinin bugünkü qərarı ilə nağd və qeyri-nağd mübadilə əməliyyatları zamanı milli valyutanın xarici valyutaya, habelə xarici valyutaların mübadilə məzənnəsi hədlərini həmin gün üçün AMB-nin rəsmi məzənnəsindən +/-4% məbləğində (xarici valyutanın alış məzənnədən maksimum 4%-dək aşağı, satış məzənnəsi isə rəsmi məzənnədən maksimum 4%-dək yuxarı) müəyyən edilib.

"APA-Economics"in xəbərinə görə, bu barədə AMB-nin ölkədə fəaliyyət göstərən bütün banklara və poçt rabitəsinin milli operatoruna ("Azərpoçt" MMC) ünvanladığı məktubda qeyd edilib.

"Qeyd olunanlarla əlaqədar, banklar və onların struktur bölmələri tərəfindən xarici valyuta məzənnələrinin müəyyən olunması zamanı Mərkəzi Bank tərəfindən tətbiq edilmiş limitə riayət edilməsinə ciddi nəzarət olunmalıdır", - deyə məktubda qeyd edilib.

17:31

Azərbaycan Mərkəzi Bankı (AMB) valyutanın satış məzənnəsinin alış məzənnəsindən kənarlaşma həddi ilə bağlı banklara məktub göndərib.

"APA-Economics"in məlumatına görə, məktubda bildirilir ki, banklar satış məzənnəsinin alış məzənnəsindən kənarlaşma həddi kimi 4%-lik limitə əməl etməlidir. Əvvəllər bu limit 2% səviyyəsində idi.

Başqa sözlə, banklar xarici valyutanın alqı-satqısı zamanı AMB-nin müəyyən etdiyi rəsmi məzənnədən 4% kənarlaşa bilər.