Mərkəzi Bank strateji hədəflərinə uyğun olaraq bank nəzarətinin requlyativ çərçivəsinin təkmilləşdirilməsi və hər bir əsas risk növünün prudensial tələblərlə əhatə olunması prosesini davam etdirir.
Mərkəzi Bankın Kommunikasiya Departamentindən Lent.az-a verilən məlumata görə, bu istiqamətdə Mərkəzi Bank tərəfindən “Banklarda risklərin idarə edilməsi” Qaydaları yenidən işlənib və bank ictimaiyyəti ilə müzakirəsinə başlanılmışdır.
Qaydaların yeni variantında əsas dəyişikliklər banklarda risklərin idarə edilməsi sisteminin daha effektiv təşkilinə, o cümlədən təfsilatlı risk strategiyasının müəyyən edilməsinə, risk menecmenti funksiyasının qərar qəbuletmə proseslərində səmərəli iştirakının təmin edilməsinə, “Baş Risk İnzibatçısı” vəzifəsinin müəyyən olunması və onun vəzifə və səlahiyyətlərinin təsbit edilməsinə, habelə risk menecmentinin alətlər arsenalının genişləndirilməsi və yeni hesabatlıq rejiminin müəyyən edilməsinə yönəlib.
Qeyd edək ki, son illərdə Mərkəzi Bank tərəfindən həyata keçirilən sistemli tədbirlər nəticəsində banklarda qabaqcıl beynəlxalq praktikaya müvafiq korporativ idarəetmə standartlarının tətbiqinə, risklərin idarə edilməsi təcrübəsinin əhatə dairəsinin genişlənməsinə və risk funksiyasının əhəmiyyətinin yüksəlməsinə nail olunub.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
