Aprelin 1-dən buğda və un idxalına ƏDV bərpa edilir

Bu ilin aprel ayının 1-dən Azərbaycana idxal olunan ərzaq buğdası və una əlavə dəyər vergisi (ƏDV) tətbiq ediləcək.

“APA-ECONOMICS”in məlumatına görə, bunu kənd təsərrüfatı naziri İsmət Abasov bildirib.

İ.Abasovun sözlərinə görə, Azərbaycana idxal olunan ərzaq buğdası və unun ƏDV-dən azad edilməsi ilə bağlı Nazirlər Kabinetinin 2008-ci ilin aprelin 1-dən qüvvəyə minən qərarının müddəti artıq başa çatır. “Fikrimizcə, bu, ölkədə taxıl istehsalçılarının marağını artıracaq və yerli istehsalçılar məhsullarını sata biləcək”, - deyə nazir vurğulayıb.

Qeyd edək ki, ötən il Azərbaycanda 904,7 min hektar sahədən ilkin çəkidə rekord səviyyədə - 2 498,3 min ton taxıl (qarğıdalı daxil olmaqla) məhsulu toplanılıb. Hektarın orta məhsuldarlığı 2007-ci ilə nisbətən 0,5 sentner artaraq 27,6 sentnerə yüksəlib.

Dövlət Statistika Komitəsindən verilən məlumata görə, 2008-ci ildə istehsal olunmuş taxılın 67,1%-ni və ya 1 677,5 min tonunu buğda təşkil edib. Ümumiyyətlə, 2008-ci ildə dənli və dənli paxlalıların əkin sahəsinin 2007-ci ilə nisbətən 22,3% və ya 165,2 min hektar artması ümumi istehsala müsbət təsir edib.

Xatırladaq ki, 2007-ci ildə ölkədə taxıl istehsalı 2,3 mln. ton təşkil edib.