“SOCAR-TURCAS” Birgə Müəssisəsinə lisenziya verildi

Zavod ildə 10 milyon ton emal gücünə malik olacaq

Türkiyədə fəaliyyət göstərən “SOCAR-TURCAS” Birgə Müəssisəsi tərəfindən İzmirin Əliağa bölgəsində inşa edilməsi planlaşdırılan yeni neft emalı zavodu layihəsi ilə əlaqədar işlər artıq növbəti mərhələyə qədəm qoyur.

Lent.az-ın ARDNŞ-in rəsmi saytına istinadən verdiyi məlumata görə, Türkiyənin Enerji Bazarını Tənzimləmə Qurumu (Enerji Piyasası Düzenleme Kurumu - EPDK) bununla əlaqədar “SOCAR-TURCAS” Birgə Müəssisəsinə müvafiq lisenziya verib.

Qeyd etmək lazımdır ki, lisenziyanın alınması üçün quruma 2008-ci ilin dekabrında müraciət edilib. Qazanılmış uğurlar barədə məlumat verən “SOCAR-TURCAS” Birgə Müəssisəsinin icraçı direktoru və “Petkim”in İdarə heyətinin üzvü Kənan Yavuz bildirib ki, türk sənayesi və idxalatında böyük əhəmiyyətə malik layihə əsasında qurulacaq zavod ildə 10 milyon ton emal gücünə malik olacaq. Yeni zavodun tikintisi dövründə burda 7-10 min, fəaliyyətə başladıqdan sonra isə min nəfər çalışacaq. O vurğulayıb ki, Əliağa bölgəsində yeni neft emalı zavodunun inşası üzrə aparılan fəaliyyət bundan sonra da planauyğun şəkildə müvəffəqiyyətlə davam etdiriləcək.