Hesablama Palatası icra hakimiyyətlərini yoxlayacaq

Lent.az-ın palatanın rəsmi saytına istinadən verdiyi məlumata görə, dövlət büdcəsinin dövlət əsaslı vəsait qoyuluşundan Aqrar Universitetə tədris korpuslarının təmiri və avadanlıqlarla təchiz edilməsinə ayrılan vəsaitlərin istifadəsinə, Qaradağ rayon İcra hakimiyyətinin tabeliyində olan idarə, müəssisə və təşkilatlara dövlət büdcəsinin “Mənzil və kommunal təsərrüfatı” bölməsindən ayrılan vəsaitlərin proqnozlaşdırılması və istifadəsinə, Şabran və Siyəzən rayonlarının yerli icra hakimiyyəti orqanları tərəfindən dövlət mülkiyyətində olan torpaqların istifadə vəziyyətinə, Şəmkir rayon İcra hakimiyyətinin tabeliyində olan idarə, müəssisə və təşkilatlara dövlət büdcəsinin “Mənzil və kommunal təsərrüfatı” bölməsindən ayrılan vəsaitlərin proqnozlaşdırılması və istifadəsinə, “Azərelektrikşəbəkətikinti” ASC tərəfindən dövlət vergilərinin vergi qanunvericiliyinə uyğun hesablanılması və dövlət büdcəsinə ödənilməsinə dair Rəy və Hesabatlar müzakirə olunaraq təsdiq olunub, Nəzarət tədbirlərinin nəticələri barədə Milli Məclisə məlumatların təqdim edilməsi qərara alınıb.

Kollegiya iclasında, həmçinin, Xəzər rayon İcra hakimiyyətinin tabeliyində olan idarə, müəssisə və təşkilatlara dövlət büdcəsinin “Mənzil və kommunal təsərrüfatı” bölməsindən ayrılan vəsaitlərin proqnozlaşdırılması və istifadəsinə, İsmayıllı və Neftçala rayonları üzrə yerli İcra hakimiyyəti orqanları tərəfindən dövlət mülkiyyətində olan torpaqların istifadə vəziyyətinə və dövlət büdcəsi xərclərinin funksional təsnifatının “ Təhsil xərcləri” bölməsinin “Texniki-peşə məktəbləri və liseylər” köməkçi bölməsinin “Orta-ixtisas təhsili” paraqrafı üzrə Naxçıvan Muxtar Respublikasının büdcəsindən Naxçıvan Tibb Kollecinin saxlanılmasına ayrılan vəsaitlərin proqnozlaşdırılması və icrasına dair Audit proqramları da təsdiq edilib.