7 km yol əsaslı təmir ediləcək

“Azərbaycan Respublikasında dəmir yolu nəqliyyat sisteminin 2010-2014-cü illərdə inkişafına dair Dövlət Proqramı”nın icrası çərçivəsində 20-27 sentyabr tarixlərində növbəti yol qoyuluşu həyata keçiriləcək və 7 km yol əsaslı təmir olunacaq.

“Azərbaycan Dəmir Yolları” Qapalı Səhmdar Cəmiyyəti Mətbuat Katibliyinin rəisi Nadir Əzməmmədovun Lent.az-a verilən məlumata görə, 20-22 sentyabrda Tovuz-Qovlar mənzilində 4, 2 km, 25-27 sentyabrda isə Qovlar-Zəyəm mənzilində 2,8 km olmaqla, cəmi 7 km yolun əsaslı təmir edilməsi nəzərdə tutulur.

Qeyd edək ki, Dövlət Proqramı çərçivəsində Bakı-Böyük Kəsik istiqamətində 317 km yolun əsaslı təmirinə 10 iyun 2011-ci ildə Tatlı-Ağstafa sahəsinin 97-ci kilometrində start verilib. Bu günə kimi 117 km yol əsaslı təmir olunub. Əsaslı təmir işlərini “Azərbaycan Dəmir Yolları” QSC “Dəmiryolservis” MMC-nin müəssisələri və İnfrastruktur Departamentinin müvafiq qurumları həyata keçirir. “Dəmiryolservis” MMC-nin baş direktoru Əli Əşrəf Lütfəlibəyov bildirib ki, bu gün səhər saatlarında Tovuz-Qovlar mənzilinin 110-cu kilometrində söküntü işlərinə başlanılıb.