"Çelsi"nin futbolçusu Santosun yarım milyonu qarət edildi

Braziliyalı yarımmüdafiəçi Andrey Santosun evi həftə sonu “Lill” ilə Liqa 1 oyununda olarkən qarət edilib.

Lent.az xarici KİV-ə istinadla xəbər verir ki, "Çelsi"dən icarəyə götürülən “Strasbur”un yarımmüdafiəçi 500 min avro dəyərində qiymətli əşyalarını itirib.

Bildirilir ki, naməlum cinayətkarlar 20 yaşlı braziliyalı futbolçunun evinin qapısını sındıraraq qiymətli əşyaları və qızıl-zinət əşyalarını aparıblar.

Eyni zamanda, Andrey Santosun özü “Strasbur”a “Lill”ə qələbə qazandıran qollarından birini vurub və komandası Fransa çempionatının 19-cu turunda 2:1 hesabı ilə qalib gəlib.

Oğurluqdan sonra braziliyalı oğrulara müraciət edərək oğurladıqları malları 24 saat ərzində geri qaytarmalarını istəyib.