AFFA daha bir qalmaqallı oyunla bağlı cərimələr yağdırdı

AFFA İntizam Komitəsi Unibank Premyer Liqasının XXVI turunda “Neftçi” və “Qəbələ” komandaları arasında keçirilmiş matçda baş verən qalmaqalla bağlı cəza tədbirləri görüb.

Lent.az-ın Peşəkar Futbol Liqasının rəsmi saytına istinadən verdiyi məlumata görə, bu oyunda yaşanan xoşagəlməz olaylar hər iki kluba ümumilikdə 7 min manat cərimə tətbiq edilib.

Qarşılaşmada 4 futbolçusu sarı vərəqə ilə cəzalandığı üçün “Qəbələ” 1000 manat cərimə olunub. 63-cü dəqiqədə meydançaya kənar əşya atıldığı üçün “Neftçi” 2000 manat ziyana düşüb. Oyun bitdikdən sonra bir-birini vurduğuna görə “flaqman”ın kapitanı Rail Məlikovla “Qəbələ”nin oyunçusu Revaz Getsadze 2 oyunluq cəzalandırılıb. Klublar isə daha 2000 manat cərimələnib.

Futbolçulara verilmiş cəzanın yarısı şərti tətbiq ediləcək. Yəni cəzalı oyunçu 6 ay müddətində qayda pozuntusuna yol verərlərsə, sanksiyanın dayandırılmış hissəsi avtomatik bərpa olunacaq və yeni sanksiya əvvəlki sanksiyaya tam əlavə ediləcək.