Yol polisi ilə qadın sürücü əlbəyaxa oldu - Bakıda görünməmiş olay

Bir neçə gün öncə Bakıda yol polisi inspektoru ilə qadın sürücü arasında gərgin anlar yaşanıb. Hadisəni əks etdirən video material yayılıb. Lent.az avtosfer.az-a istinadən xəbər verir ki, görüntüləri hadisə şahidlərindən biri qeydə alıb. 99 FH 475 nömrə nişanlı avtomobilin qadın sürücüsü yol polisini inadla avtomobilindən kənarlaşdırmağa cəhd edib. Videodan 99 YP 497 nömrə nişanlı YPX ekipajının əməkdaşı olduğu bilinən Əlövsət adlı polis sürücü qadına qarşı kobudluq edərək onu yerə yıxır. Daha sonra öz avtomobilinə pəncərədən minən qadının ardınca polis də pəncərədən maşına daxil olur. Baxmayaraq ki, onların daxil olduğu qabaq oturacaqda sərnişin də əyləşib.

Bakı şəhər Dövlət Yol Polis İdarəsinin İctimaiyyətlə Əlaqələr Şöbəsinin rəisi Vaqif Əsədov qafqazinfo-ya bildirib ki, hadisədən məlumatlıdır, hazırda araşdırmalar aparılır: “İlkin əldə olunan məlumata görə, qadın polisin əmrinə tabe olmayıb, onun üzünü cırmaqlayıb. Hazırda həmin polis hospitaldadır. Xanımın əri də maşında olub. Sürücünün sənədi olmayıb. Sürücü isə Xətai rayon məhkəməsində cərimə olunub. Hadisə barədə ətraflı məlumatı isə bir azdan verəcəyik”.

Qeyd edək ki, şahidlər hadisənin Xətai rayonu, Süleyman Vəzirov küçəsində baş verdiyini bildiriblər.