Sürücülərin nəzərinə: Bakıda və magistral yollarda hərəkət dayanacaq

^{Baş Dövlət Yol Polisi İdarəsi Azərbaycanda keçiriləcək beynəlxalq velosiped turu ilə əlaqədar məlumat yayıb. BDYPİ-dən Lent.az-a verilən məlumata görə, mayın 1-dən 5-dək Heydər Əliyevin 90 illik yubileyinə həsr olunmuş, Bakı şəhəri, Abşeron, Qobustan, Şamaxı, İsmayıllı, Qəbələ, Oğuz, Şəki rayonlarının ərazisindən keçməklə 5 mərhələdən ibarət olan beynəlxalq velosiped turu keçiriləcək.}

^{Velosiped turu may ayının 1-də Heydər Əliyev mərkəzinin qarşısında start götürəcək, Heydər Əliyev mərkəzi – metronun “Koroğlu” stansiyası - Heydər Əliyev mərkəzi marşrutu üzrə 11 dəfə dövrə vurmaqla başa çatacaq. Turun ikinci mərhələsi may ayının 2-də Bakı şəhərində Şıx çimərliyi ilə üzbəüz ərazidəki Velosiped parkından start götürərək “Bakı – Abşeron – Qobustan – Şamaxı – İsmayıllı” marşrutu üzrə keçiriləcək. Üçüncü mərhələ mayın 3-də “Qəbələ - Oğuz – Şəki – Oğuz- Qəbələ”, dördüncü mərhələ mayın 4-də “Qəbələ - Şamaxı”, beşinci - sonuncu mərhələ isə mayın 5-də Azadlıq meydanından start götürərək Bakı şəhərinin mərkəzi küçələri ilə 12 dəfə dövrə vurmaqla yekunlaşdırılacaq. Bununla əlaqədar qeyd olunan vaxtlarda tədbirin keçiriləcəyi ərazilərdə nəqliyyat vasitələrinin hərəkətinə məhdudiyyət qoyulacaq.}