Dövlət sərhədini pozan 39 nəfər saxlanılıb

Cari ilin aprel ayı ərzində dövlət sərhədini pozduqlarına görə 26 halda 39 nəfər saxlanılıb.

Dövlət Sərhəd Xidmətindən Lent.az-a verilən məlumata görə, onların 12 nəfəri Azərbaycan, 8 nəfəri Banqladeş, 5 nəfəri Nigeriya, 4 nəfəri İran, 3 nəfəri Özbəkistan, 2 nəfəri Gürcüstan, hər ölkədən bir nəfər olmaqla Əfqanıstan, Tacikistan, Fransa, Syerra Leone və Moldova vətəndaşı olub.

Həmçinin, sərhəd rejim qaydalarını pozarkən yaşıl sərhəddə 9 halda 15 nəfər, Xəzər dənizində 42 halda 68 nəfər, Sərhəd Nəzarət Məntəqələrində 469 halda 590 nəfər saxlanılaraq barələrində müvafiq tədbir görülüb.

DSX-dan bildirilir ki, ötən ay ərzində axtarışda olan 342 nəfər cinayətkarlığa qarşı mübarizə tədbirləri nəticəsində Azərbaycan hüquq-mühafizə orqanları tərəfindən

aşkarlanaraq aidiyyəti orqanlara təhvil verilib.

Bundan başqa, narkotik vasitələrin qeyri-qanuni dövriyyəsinə qarşı mübarizə tədbirləri nəticəsində 13 halda 506 kiloqram 183,5 qram narkotik maddənin dövlət sərhədindən keçirilməsinin qarşısı alınıb.

Ötən ayın statistik nəticələrinə görə, aprel ayının 20-də Biləsuvar rayonunun Biləsuvar kənd ərazisindəki zastavanın xidməti sahəsində rayon sakinləri Əsgərov Mübariz Müqabil oğlu və Məmmədzadə Anar Qurbanəli oğlu 1010 qutu “DC”, 490 qutu “MM” markalı siqaret və 1 kq qurudulmuş marixuana ilə yaxalanıblar.

116 halda ümumi dəyəri təqribən 20 milyon 401 min manat olan qaçaqmal, o cümlədən 1 ədəd tapança, 1 ədəd pnevmatik tüfəng, 17 000 Azərbaycan manatı , 29988 qutu siqaret, 600 qram civə, 92 ədəd mobil telefon, müxtəlif növ dərman preparatları, spirtli içki və sənaye malları qaçaqmalçılıq fəaliyyətinə qarşı mübarizə çərçivəsində həyata keçirilmiş tədbirlər nəticəsində saxlanılıb.