Oğurluq etmək istəyən qardaşlar tutuldu

Oğurluğa cəhd göstərmiş Masallı rayon sakini və paytaxt sakinləri olan iki qardaş saxlanılıb.

DİN-in mətbuat xidmətindən Lent.az-a verilən məlumata görə, Nizami RPİ 23-cü PB əməkdaşlarının həyata keçirdikləri əməliyyat-axtarış tədbirləri nəticəsində martın 31-də rayonun N.Abdullayev küçəsində Bakı şəhər sakini Mikayıl Xəlilova məxsus “KamAZ” markalı avtomobildən akkumulyator oğurlamağa cəhd göstərmiş Masallı rayon sakini Yusif Yusubov, paytaxt sakinləri Zəki İsmayılov və qardaşı Pərviz tutulmuşlar. Ətraflarında aparılmış əməliyyat tədbirlərilə onların martın 4-də Hümbət Hümbətova məxsus “VAZ-21011” markalı avtomobili qaçırmaları və martın 28-də daha bir avtomobildən 4 ədəd səsgücləndirici oğurlamaları da müəyyən edilib.

Bundan başqa, Mingəçevir ŞPŞ əməkdaşlarının həyata keçirdikləri əməliyyat-axtarış tədbirləri nəticəsində martın 31-də “Berke” MMC-yə məxsus şəbəkə stansiyasından 800 manat dəyərində “Elemax” markalı mobil generatoru oğurlamış şəhər sakini Nahid Mahmudov tutulub.

Həmçinin, Astara RPŞ əməkdaşlarının həyata keçirdikləri əməliyyat-axtarış tədbirləri nəticəsində aprelin 1-də şəhər sakini Hacıağa Ağayevə məxsus mağazadan 100 manat və tütün məmulatı oğurlamış həmyerlisi Elnur Hüseynov saxlanılıb.