Nabranda ayağını itirmiş uşaqdan son xəbər

İmran Cəfərzadənin ayaqlarında növbəti cərrahiyyə əməliyyatı olub. Azərbaycanın Almaniyadakı səfirliyindən APA-ya verilən xəbərə görə, Almaniyanın “Charite” klinikasında müalicə olunan 3 yaşlı İmran Cəfərzadənin ayaqlarında avqustun 6-da keçirilən əməliyyatdan sonrakı konsiliumda həkimlər İmran Cəfərzadənin sağalmasında böyük irəliləyiş olunduğunu bildirib. Klinikanın mütəxəssisləri bütövlükdə müayinənin və əməliyyatın nəticələrindən razı qalıb.

Qeyd edək ki, növbəti müayinə avqustun 9-na, əməliyyat isə avqustun 12-nə təyin olunub.

Həkimlər xəstənin fiziki və psixoloji durumunu normal hesab edir.

Azərbaycanın Almaniyadakı səfirliyi İmran Cəfərzadənin müalicəsini daim diqqət mərkəzində saxlayır, xəstənin durumuna dair yeniliklər barədə mütəmadi olaraq Prezident Administrasiyasını, Heydər Əliyev Fondunu və ictimaiyyəti məlumatlandırır.

Qeyd edək ki, İmran Cəfərzadənin Almaniyadakı müalicəsi Azərbaycan prezidenti İlham Əliyevin göstərişi əsasında Heydər Əliyev Fondunun dəstəyi və Azərbaycanın Almaniyadakı səfirliyinin təşkilatçılığı ilə həyata keçirilir.