Bakı metrosunda həyəcanlı anlar - YENİLƏNİB

“Bakı Metropoliteni İdarəsinin “Elmlər Akademiyası” stansiyasında qatarda yanğın baş verməsi xəbəri həqiqəti əks etdirmir”.

Bunu Lent.az-a açıqlamasında Bakı Metropoliteni İdarəsinin Yanğından Hərbiləşdirilmiş Mühafizə Şöbəsinin rəisi Vidadi Tağıyev söyləyib.

Vidadi Tağıyev bildirib ki, saat 17:30 radələrində “Elmlər Akademiyası” stansiyasında qatarın vaqonlarından birində qoxu gəlməyə başlayıb: “Cüzi bir iyi gəlib, sərnişinlər təlaşa düşüblər. Qatar hərəkət edirsə, mühərrik işləyirsə, vaqondan iy də gələ bilər. Vaqonda hər hansı tüstülənmə də olmayıb, bu barədə yayılan xəbərlər də əsassızdır. Şükürlər olsun ki, hər hansı problem yoxdur. Mən özüm “Elmlər Akademiyası” stansiyasına getdim, qatarda oldum, bir neçə stansiya da qatarla gəldim. Narahatçılığa əsas yoxdur”.

Bakı Şəhəri Təcili və Təxirəsalınmaz Tibbi Yardım Stansiyasının baş həkimi Mürsəl Həmidov isə Lent.az-a açıqlamasında bildirib ki, saat 17.34 radələrində stansiyaya "Elmlər Akademiyası" metrosunda yanğın olması ilə bağlı çağırış daxil olub. Əraziyə 3 təcili yardım briqadası göndərilib: "Orada yanğın olmayıb, tüstülənmə olub. 6 nəfər təcili yardıma müraciət edib. Onlarda isterik nevroz, yüngül boğulma qeydə alınıb. Həmin şəxslərə yerində ambulator yardım göstərilib".