Lənkəranda 52 yaşlı kişini maşın vurdu: sürücünün yanındakı azyaşlı yaralandı

APA-nın cənub bürosunun məlumatına görə, hadisə aprelin 4-də saat 22.30 radələrində Ələt-Astara magistralının 199-cu kilometrliyində, yolun Lənkəran şəhəri ərazisindən keçən hissəsində qeydə alınıb.

Lənkəran şəhər sakini Ceyhun Etibar oğlu Məmmədovun idarə etdiyi “VAZ-2107” markalı, 42 BL 207 dövlət nömrə nişanlı minik avtomobili hərəkətdə olarkən qəfildən piyada, rayonun Şilavar kənd sakini, 52 yaşlı Lətif Qafur oğlu Abbasov onun yoluna çıxıb. Nəticədə avtomobilin qabaq hissəsinə çırpılan L.Abbasov, eləcə də sürücünün yanında əyləşmiş 3 yaşlı oğlu Əli Məmmədov qapalı kəllə-beyin travması və bədəninin müxtəlif nahiyələrinin əzilməsi diaqnozu ilə Lənkəran Mərkəzi Rayon Xəstəxanasına yerləşdirilib.

Yaralıların vəziyyəti orta-ağır kimi qiymətləndirilir. Qəzanın dəqiq başvermə səbəbləri həyata keçirilən ekspertizanın verəcəyi rəydən sonra məlum olacaq. Faktla bağlı Daxili İşlər Nazirliyinin Baş Dövlət Yol Polisi İdarəsinin istintaq və təhqiqat şöbəsində araşdırma aparılır.