Zeynal Nağdəliyevin düşdüyü qəzada yaralanan şəxs ÖLDÜ - YENİLƏNİB

Prezident Adiministrasiyasının şöbə müdiri Zeynal Nağdəliyevin düşdüyü qəzada ağır yaralanan şəxs xəstəxanada vəfat edib. Lent.az-ın məlumatına görə, Z.Nağdəliyevin içində olduğu 90 PA 655 nömrə nişanlı "Toyota Land Cruiser" markalı avtomobil ilə Kürdəmir rayon sakini, 1993-cü il təvəllüdlü Cəbiyev Nazim Tofiq oğlunun idarə etdiyi 99 EV 215 nömrəli "VAZ 21015" markalı avtomobilin toqquşması nəticəsində ağır yaralanan N.Cəbiyevin həyatını xilas etmək mümkün olmayıb. O, Kürdəmir rayon Mərkəzi Xəstəxanasında keçinib. Yüngül xəsarətlər alan Z.Nağdəliyev isə helikopterlə Bakıdakı xəstəxnaların birinə gətirilib.

Baş Dövlət Yol Polisi İdarəsindən Lent.az-a verilən məlumata görə, faktla bağlı Cinayət Məcəlləsinin 263.2-ci (Yol hərəkəti və nəqliyyat vasitələrinin istismarı qaydalarını pozma - ehtiyatsızlıqdan zərərçəkmiş şəxsin ölümünə səbəb olduqda) maddəsi ilə iş başlanılıb. Faktla bağlı müvafiq ekspertizalar təyin edilib, araşdırmalar aparılır.

*****

10:24

Lent.az-ın APA-ya istinadən verdiyi xəbərə görə, hadisə avqustun 5-də axşam saatlarında Bakı-Qazax avtomobil yolunun Kürdəmir rayonunun Qarabucaq kəndi ərazisindən keçən hissəsində qeydə alınıb.

Kürdəmir sakini, 1993-cü il təvəllüdlü Cəbiyev Nazim Tofiq oğlunun idarə etdiyi “VAZ 21015” markalı minik maşını qarşı tərəfdən gələn Azərbaycan Respublikası Prezidentinin Administrasiyasına məxsus BMW markalı xidməti maşınla toqquşub.

Hadisə nəticəsində BMW markalı xidməti maşında olan Azərbaycan Respublikası Prezidenti Administrasiyasının Regional idarəetmə və yerli özünüidarəetmə orqanları ilə iş şöbəsinin müdiri, Azərbaycan Respublikası Prezidenti Administrasiyası rəhbərinin müavini, Bakı şəhər sakini, 1957-ci il təvəllüdlü Zeynal Nağdəliyev və “VAZ 21015” markalı avtomobilin sürücüsü, 21 yaşlı Nazim Cəbiyev müxtəlif bədən xəsarətləri alaraq Kürdəmir Mərkəzi Rayon Xəstəxanasına yerləşdiriliblər.

Xəstəxanadan APA-ya verilən məlumata görə, çənə və alın nahiyəsindən müxtəlif xəsarətlər alan Z. Nağdəliyev helikopterlə Bakı şəhərinə göndərilib.

Faktla bağlı Baş Dövlət Yol Polisi İdarəsinin istintaq və təhqiqat şöbəsi tərəfindən araşdırma aparılır.

Qeyd edək ki, Z. Nağdəliyevin Kürdəmir rayonu ərazisində avtomobil qəzasına düşdüyü barədə ilk olaraq musavat.com saytı məlumat yayıb.