İki "Jiquli" toqquşdu: ölən var

Ağsu rayonunda ağır yol qəzası baş verib.

Lent.az-ın trend-ə istinadla verdiyi məlumata görə, hadisə Ağsu-Kürdəmir yolunun 14-cü kilometrliyində baş verib.

Ağsudan Kürdəmir istiqamətində hərəkətdə olan 57 yaşlı Mayılov Vaqif Dövlət oğlu idarə etdiyi 10 GP 275 dövlət nömrə nişanlı "VAZ 21074" markalı avtomobillə əks istiqamətdən gələn 24 yaşlı Hacalıyev Vahid Hacalı oğlunun idarə etdiyi 31 BE 962 dövlət nömrə nişanlı "VAZ 21074" markalı avtomobillə toqquşub.

Hadisə nəticəsində V.Mayılov və sərnişinləri, 33 yaşlı Qüdrətli Şahin Nəsrəddin oğlu, 58 yaşlı Əmirova Şəla Osman qızı, digər sürücü Vahid Hacalıyev və sərnişini, 52 yaşlı Səfərova Zeynəb Musa qızı ağır bədən xəsarətləri ilə Ağsu rayon Mərkəzi Xəstəxanasına yerləşdirilib. V.Hacalıyev xəstəxanada dünyasını dəyişib.

Faktla bağlı cinayət işi başlanıb.