Ədəbiyyat İnstitutu: İşçimizin İrana nə məqsədlə getdiyini bilmirik

Azərbaycan Milli Elmlər Akademiyasının (AMEA) Nizami adına Ədəbiyyat İnstitutunun elmi işçisi, Şəhriyarşünas alim, araşdırmaçı-yazar Xalidə Xalid Təbrizdə həbs edilib. Lent.az-ın məlumatına görə, X.Xalid aprelin 30-da gecə saatlarında azərbaycanlı fəal Məhəmməd (Oxtay) Rəşidinin ata evində İran İnformasiya, Təhlükəsizlik və Kəşfiyyat Nazirliyinin (ETTELAAT) əməkdaşları tərəfindən tutulub. Məsələ ilə bağlı Ədəbiyyat İnstitutu ilə əlaqə saxladıq. İnstitutun direktor müavini Məhərrəm Qasımlı Lent.az-a bildirib ki, bu məsələdən xəbərdardırlar: “Xalidə xanımın hansı səbəbdən həbs olunmasını bilmirəm. Mətbuat vasitəsi ilə xəbər tutdum ki, əməkdaşımız İranda həbs olunub”.

M. Qasımlının sözlərinə görə, X. Xalid aprelin 26-dan etibarən işə də gəlmirmiş: “Bir neçə gündür o işə gəlmir. Heç icazə də almayıb. İşə gəlməməyinin səbəbi də bəlli deyil. Bir də onu qeyd edim ki, Xalidə Xalid İrana Ədəbiyyat İnstitutu tərəfindən göndərilməyib. Nə məqsədlə getdiyini biz də bilmirik”.