DGK-da ABŞ-ın Narkotiklərlə Mübarizə İdarəsinin əməkdaşları ilə görüş keçirilib

Dövlət Gömrük Komitəsində Amerika Birləşmiş Ştatlarının Narkotiklərlə Mübarizə İdarəsinin Ankara ofisinin əməkdaşları ilə görüş keçirilib.

Lent.az-ın komitənin mətbuat xidmətinə istinadən məlumatına görə, görüşdə Gömrük Hüquqpozmalarına Qarşı Mübarizə Baş İdarəsinin rəisi, gömrük xidməti polkovniki Baba Salayev, ABŞ-ın Narkotiklərlə Mübarizə İdarəsinin Ankara ofisinin əməkdaşları Adnan Mert, Co Lenseyn və Klement Ize iştirak edib.

Görüşdə bu ilin mart ayında Azərbaycan gömrük xidmətinin həyata keçirdiyi uğurlu əməliyyat nəticəsində İran İslam RespublikasındanAzərbaycandan tranzit yolla keçməklə Ukraynaya aparılan 486 kq 698,88 qram heroinin aşkar edilməsi ilə bağlı qonaqlara məlumat verilmiş, eləcə də qarşılıqlı əməkdaşlığın istiqamətləri, aşkar edilən narkotrafik marşrutları, Bakı-Tbilisi-Qars dəmiryolunun və Ələt qəsəbəsində tikintisi davam etdirilən Bakı Beynəlxalq Dəniz Ticarəti Limanının gələcəkdə istismara verilməsi ilə əlaqədar gömrük hüquqpozmalarına qarşı mübarizənin daha effektiv təşkili, eləcə də qarşılıqlı maraq doğuran digər məsələlər üzrə fikir mübadiləsi aparılıb.

Sonda tərəflər əməkdaşlığın daha da inkişaf etdirilməsi istiqamətində səylərin artırılmasının vacibliyini vurğulayıblar.