Baş Polis İdarəsi müxalifətin mitinqi ilə bağlı məlumat yaydı

Bakı şəhər Baş Polis İdarəsi sentyabrın 22-də Milli Şuranın Yasamal rayonu ərazisində təşkil etdiyi mitinqlə bağlı məlumat yayıb. Daxili İşlər Nazirliyinin mətbuat xidmətindən Lent.az-a daxil olan məlumatda bildirilir ki, dünən özünü Demokratik Qüvvələrin Milli Şurası adlandıran qurumun prezidentliyə namizədi Cəmil Həsənlinin Yasamal rayon İdman-Sağlamlıq Kompleksinin stadionunda Bakı Şəhər İcra Hakimiyyəti ilə razılaşdırılmış mitinqi keçirilib. Saat 16:00-dan 18.00-dək davam edən toplantıda həmin quruma daxil olan AXCP, Müsavat, ACP, KXCP, El Hərəkatı, eləcə də, bir sıra digər müxalifətyönlü partiyaların, qeyri-hökumət və gənclər təşkilatlarının ümumi sayı 2000 (iki min) nəfərədək olan üzvü və təəssübkeşi iştirak edib.

İctimai asayişin və hüquq qaydasının kobud şəkildə pozulması hallarına yol verilməyib.