9-cu dəfə həbsə girir - Bakıda tutulan silahlı şəxs - YENİLƏNİB

Bakı şəhərinin Xətai rayonunda tutulan silahlı şəxslə bağlı bəzi maraqlı məqamlar üzə çıxıb. Lent.az-ın məlumatına görə, 37-ci Polis Bölməsinin əməkdaşları keçirdiyi əməliyyat axtarış tədbirləri nəticəsində əvvəllər də 8 dəfə məhkum olunmaqla 20 il həbsdə yatmış Bakı şəhər sakini, 43 yaşlı Çingiz Hacıyev şübhəli şəxs qismində saxlanılıb. Onun üstünə baxış zamanı sandıqçasında 3 ədəd güllə olan “Makarov” markalı tapança aşkarlanaraq maddi sübut kimi götürülüb. Təxminən 2 ay əvvəl azadlığa çıxan Çingiz Hacıyev ilkin ifadəsində bildirib ki, silahı guya bir neçə gün bundan qabaq tapıb. Elə həmin vaxtdan da üstündə gəzdirməyə başlayıb. Saxlanılan şəxs onu da bildirib ki, tapançanı satmaq niyyətində olub. Bunun üçün müştəri də axtarıb. Lakin polis əməkdaşları onu yaxaladığından istəyinə çata bilməyib.

Silahdan hər hansı cinayətdə istifadə edilib edilmədiyini kriminalistik ekspertiza araşdırır. Faktla bağlı cinayət işi açılıb, istintaq saxlanılan şəxsin soyğunçuluq və oğurluq cinayətləri törətdiyini də ehtimal etdiyindən bu istiqamətdə araşdırmalar davam etdirilir. Gördüyünüz bu şəxsin cinayət əməllərindən zərərçəkmiş vətəndaşlardan Xətai Rayon Polis İdarəsinə müraciət etmələri xahiş olunur.

*****

11:44

Bakıda tapançalı şəxs tutulub. Bakı şəhər Baş Polis İdarəsindən Lent.az-a verilən məlumata görə, Xətai rayonun Xocalı prospektində şübhəli şəxs qismində əvvəllər məhkum olunmuş Çingiz Hacıyev saxlanılıb. Onun üzərində və evində axtarış zamanı buraxılış ili və nömrəsi silinən və sandıqçasında 3 ədəd patron olan Makarov tapançası aşkar edilərək götürülüb.

Faktla bağlı araşdırma aparılır.