Bakıda dəhşətli qəzada ölənlərdən ikisinin kimliyi bilindi - YENİLƏNİB

Bu gecə Bakıda baş vermiş dəhşətli qəzada dünyasını dəyişən 4 nəfərdən ikisinin şəxsiyyəti məlum olub. Lent.az-ın məlumatına görə, Sabunçu-Zabrat yolunda "VAZ 21 02" markalı minik avtomobilinin "KamAZ" markalı yük maşınına çırpılması nəticəsində minik avtomobilinin sürücüsü, 1985-ci il təvəllüdlü Əliyev Elçin Nizaməddin oğlu və sərnişini, 1968-ci il təvəllüdlü Məmmədov Qəhrəman Qafar oğlu dünyasını dəyişib. Həmin avtomobildə olan digər iki sərnişin: bir kişi və bir qadının isə kimliyini müəyyən etmək hələ də mümkün olmayıb.

Faktla bağlı Sabunçu RPİ-də cinayət işi açılıb, araşdırmalar aparılır.

*****

6:47

APA-nın məlumatına görə, hadisə şəhər şosesində qeydə alınıb. Elçin Alıyev idarə etdiyi "VAZ 2102" markalı avtomobillə Maştağa istiqamətində yüksək sürətlə hərəkətdə olarkən idarəetməni itirib və yolun kənarında dayanan “KAMAZ” a arxadan çırpılıb. Nəticədə avtomobildə olan sürücü və 3 sərnişin aldıqları xəsarətdən hadisə yerindəcə dünyalarını dəyişiblər.

Dərhal hadisə yerinə FHN-nin xilasediciləri , Sabunçu Rayon Polis İdarəsinin əməkdaşları və təcili yardım briqadası cəlb olunub. Xilasedicilər deformasiyaya uğramış avtomobildən cəsədləri çıxararaq aidiyyatı üzrə təhvil veriblər.

Hadisənin baş verdiyinə gəldikdə isə, ilkin ehtimal olaraq "VAZ 2102" avtomobilinin sürücüsünün yol hərəkəti qaydalarını pozması və yüksək sürət göstərilir.