Bakıda “VAZ-2107” ilə toqquşan “Chevrolet” yandı: 1 ölü, 2 yaralı

Bakı. Mahir Məmmədli-APA. Bakının Nizami rayonu ərazisində, Ziya Bünyadov prospektində baş vermiş ağır yol-nəqliyyat hadisəsi nəticəsində 1 nəfər ölüb, 2 nəfər yaralanıb.

APA-nın məlumatına görə, 49 yaşlı Fərrux Ataman oğlunun idarə etdiyi “VAZ-2107” markalı avtomobil Ziya Bünyadov prospekti ilə metronun "Qara Qarayev" stansiyası istiqamətində hərəkətdə olarkən əks hərəkət zolağına çıxıb. Nəticədə “VAZ-2107” qarşıdan gələn və Orxan Nağıyevin idarə etdiyi “Chevrolet”lə toqquşub. Toqquşma çox güclü olub və qəzaya səbəb olduğu iddia edilən avtomobilin sürücüsü Fərrux Şahbazov sükan arxasında dünyasını dəyişib.

Fərrux Şahbazovun meyitinin deformasiyaya uğramış avtomobildən çıxarılması üçün hadisə yerinə Fövqəladə Hallar Nazirliyi Xüsusi Riskli Xilasetmə Xidmətinin əməkdaşları cəlb ediliblər. Sürücünün meyiti xilasedicilər tərəfindən avtomobildən çıxarılıb.

“Chevrolet” markalı avtomobil isə toqquşmadan sonra qəfildən alışıb. Sürücü Orxan Nağıyev və sərnişin Vüqar Əliyev hadisə şahidləri tərəfindən yaralı vəziyyətdə avtomobildən çıxarılıb. Onlar 3 saylı Şəhər Klinik Xəstəxanasına çatdırılıblar. Xəstəxanadan APA-ya verilən məlumata görə, yaralıların vəziyyəti orta ağırdır.

Hadisə yerinə cəlb edilən yanğınsöndürmə briqadaları yanan avtomobili söndürüblər və ətrafdakı digər avtomobillər mühafizə olunub. “Chevrolet” isə yanaraq yararsız vəziyyətə düşüb.

Faktla bağlı Nizami Rayon Polis İdarəsində araşdırma aparılır.