Azərbaycanda maskalılar biznesmenin evinə soxulub 250 min tələb etdi

Bu gecə Balakən rayonunda iş adamının evinə silahlı basqın olub. Lent.az-ın xəbərinə görə, bu barədə anspress-ə Balakən rayon Polis Şöbəsindən məlumat verilib. Hadisə rayonun Mübariz İbrahimov küçəsində, 40 yaşlı Habil Xəlilovun evində baş verib. Mənzilə soxulan 3 maskalı şəxs ev sahibinin üstünə odlu silah çəkib. Naməlum şəxslər ev sahibindən 200 min manat pul tələb ediblər. Əks təqdirdə onu və ailəsini qətlə yetirəcəklərini deyən silahlılar ev sahibinin həyat yoldaşına və övladlarına xəsarət yetiriblər. Silahlılar 8-ci sinifdə oxuyan qızı və 11-ci sinif şagirdi olan oğlanı atanın gözü qarşısında möhkəm döyüblər. Daha sonra onun arvadına xəsarət yetiriblər.

Habil Xəlilov evə soxulan quldurlarla əlbəyaxa olub. Dava zamanı Habil Xəlilov maskalılardan iki nəfərin maskasını çıxarıb. Ev sahibi ilə bacara bilmədiklərini görən quldurlar onu elektroşokla vurublar. Səsə gələn qonşular polisə xəbər veriblər. Quldurlar qaçmaq istəyərkən onlardan bir nəfəri hüquq-mühafizə orqanlarının əməkdaşları tərəfindən tutulub. Saxlanılan şəxs 1984-cü ildə Gürcüstan respublikasında anadan olan Bakı şəhər Xətai rayon sakini Ceyhun Füzuli oğlu Bayramovdur. Balakən polisi qaçan digər şəxslərin də tapılması istiqamətində əməliyyata başlayıb.

Qeyd edək ki, Habil Xəlilov Rusiyada bizneslə məşğul olur. O, rayona 2 ay əvvəl gəlib. Oğrular biznesmenin evində külli miqdar pul olacağını düşünüblər.

Faktla bağlı araşdırma aparılır.