3 nəfərdən külli miqdarda narkotik götürülüb

Azərbaycanda bir neçə nəfərdən külli miqdarda narkotik vasitə götürülüb. Lent.az Daxili İşlər Nazirliyinin saytına istinadən xəbər verir ki, Binəqədi RPİ 6-cı PB əməkdaşlarının həyata keçirdikləri əməliyyat-axtarış tədbirləri nəticəsində Bakı şəhər sakini, əvvəllər məhkum olunmuş Azər Heybətovdan 4 kiloqram 750 qram marixuana götürülüb.

Bundan başqa Nizami RPİ 25-ci PB əməkdaşlarının həyata keçirdikləri əməliyyat-axtarış tədbirləri nəticəsində Astara rayon sakini Heydər Məmmədovdan 2 kiloqram 614,17 qram tiryək, 23,19 qram marixuana götürülüb. Onun paytaxtda kirayədə yaşadığı evə baxış zamanı isə 15 kiloqram 183 qram marixuana və 2,613 qram tiryək aşkar edilərək götürülüb.

Pirallahı RPŞ əməkdaşlarının həyata keçirdikləri əməliyyat-axtarış tədbirləri nəticəsində isə Ucar rayon sakini Rəşid Şirinovdan 705 qram heroin və 2 kiloqram 70 qram marixuana götürülüb.